Саха сирин бырабыытылыстыбатан мунньаҕын кэмигэр Ил Дархан Айсен Николаев эттэ: "Саҥа Дьыл бырааһынньыктарын кэнниттэн, кэлии-барыы үксээн, Саха сиригэр "омикрон" штамм кэлиэн сөп, онон сэрэхтээх буолуу ирдэнэр. Барытыгар суһаллык дьаһал ылардыы бэлэм олорорбут ирдэнэр".
Вице-премьер Ольга Балабкина тиэрдэринэн, өрөспүүбүлүкэтээҕи Доруобуйа Харыстабылын министиэристибэтэ саҥа ыарыы көрүҥэ кэлэр түгэнигэр, туох баар күүстэрин түмэн, бэлэм олорор.
Ольга Балабкина биллэрэринэн: "Күн аайы быстыбат кэтэбилгэ Мэҥэ-Хаҥалас, Булуҥ, Сунтаар, Орто Халыма улуустара сылдьаллар. Тоҕо диэтэххэ, кыһыҥҥы айан суола арыллан, бу улуустар уһук нэһилиэктэригэр ыалдьыбыт дьон ахсаана бэлиэтэнэр".
Саха сирин балыыһыларыгар ыарахан туруктаах 48 ыарыһах сытар. Кинилэртэн 8 киһи - реанимацияҕа.
Ыарыы сибикитэ билиннэ да, дьон тута олорор сиринэн поликлиникаттан бырааһы ыҥырар бырааптаах. Ыҥырыынан кэлбит быраас ыарыһахтан хамсыкка анаалыс ылар эбээһинэстээх. Аккаастыыр түгэнигэр, гражданнар Доруобуйа харыстабылын итии лииньийэтигэр, 122 нүөмэринэн эрийэн, быраас анаалыс ылбатаҕын туһунан тиэрдиэхтэрин сөп.
