Бу күннэргэ “Аэрофлот” уонна “Якутия” хампаанньалар субсидиялаах билиэт атыыланар усулуобуйатын уларыттылар. Ол туһунан ГАВС иһитиннэрэр.
Бастакынан. Билиэти алта ый инниттэн эрэ атыылыыр буолбуттар. Ол эбэтэр, эһиги тохсунньу 12 күнүгэр билиэт атыылаһыаххытын баҕарар буоллаххытына, тохсунньу 12 күнүттэн от ыйын 12 күнүгэр эрэ диэри көтөр билиэти атыылаһар кыахтааххыт. Онтон кэлин дуу, хаһан дуу көтүөххүтүн баҕардаххытына, кэтэһэргэ тиийэҕит.
Иккиһинэн. Уһук Илин олохтоохторун чэпчэтиилээх бырагырааматынан сылга түөртэ эрэ туһаныахха сөп буолбут, ханнык авиа-хампаанньанан айанныыртан тутулуга суох. Судургутук эттэххэ, чэпчэки сыаналаах билиэтинэн соҕуруу сылга иккитэ кэлэҕит-бараҕыт. Эбэтэр биир хайысхаҕа түөртэ көтөҕүт. Ити нэһилиэнньэ бары араҥатыгар, ол иһигэр чэпчэтиинэн туһанааччыларга эмиэ, сыһыаннаах.
Үсүһүнэн. Үөһэ ыйыллыбыт ирдэбиллэри тутуһар уонна хонтуруоллуур туһугар, аны, пассажирдар билиэт атыылаһалларын саҕана анал араспыысканы толорор буолбуттар.
Дьокуускайтан Москубаҕа диэри чэпчэтиилээх билиэт сыаната улахан дьоҥҥо – 9 200 солк., 12-гэр диэри саастаах оҕоҕо – 6 250 солк.
Санаттахха, субсидиялаах билиэтинэн маннык хампаанньалар дьону тиэйэллэр:
– “Алроса”: Мииринэй-Москуба, Полярнай-Москуба;
– “Аэрофлот”: Дьокуускай-Москуба;
– “Ред Вингс”: Мииринэй-Санкт-Петербург, Дьокуускай-Санкт-Петербург;
– “Якутия”: Нерюнгри-Москуба.
