Дьокуускай куорат оҕо уһуйааннарын экспресс-тиэстэринэн хааччыйыахтара. Эрэгийиэн урбаанньыттарын түмсүүлэрин онлайн-көрсүһүүтүн кэмигэр, Айсен Николаев Дьокуускай куорат бырабыыталыстыбатыгар уонна салалтатыгар анаан, итинник дьаһалы эттэ.
«Суһал ыстаап киинэ дьаһайыытынан, иитээччилэргэ уонна иитээччи көмөлөһөөччүлэригэр, оҕолору кытта үлэлиир дьоҥҥо, саҥа хоруона хамсыгын булар экспресс-тиэстэр тиксэриллиэхтээхтэр. Хомойуох иһин, бу уураахха судаарыстыбаннайа суох, чааһынай үөрэх тэрилтэлэрэ учуоттаммакка хаалбыттар. Саха сирин Ил Дарханын кытта көрсүһүүгэ мин бу кыһалҕа туһунан эппитим. Онуоха, Айсен Николаев Дьокуускай куорат баһылыгар Евгений Григорьевка итини суох оҥорор туһунан дьаһал биэрдэ. Маны таһынан, мунньах бүппүтүн кэнниттэн, Дьокуускай баһылыгын солбуйааччыта Наталья Романова миэхэ тахсыбыта. Биһиги кинилиин кылгас кэм иһигэр чааһынай уһуйааннартан сайаапкалары хомуйуохтаахпыт уонна эскпресс-тиэстэринэн хааччылыахтаахтарын туһунан кэпсэттибит», - диэн, “Дети Якутии” өрөспүүбүлүкэтээҕи уопсастыбаннай тэрилтэ бэрэссэдээтэлэ Валентина Старцева эппит.
