Кинилэр куорат устун улахан бөлөҕүнэн сылдьаллар. Бары кэриэтэ – сүүрбэччэлээх-отуттаах күүстэрин-уохтарын үгэнигэр сылдьар дьон.
Казахтар баахта ньыматынан биһиэхэ үлэлии кэлиилэрэ - сэдэх. Киргизияттан, Таджикистантан, Бүрээтийэттэн, Иркутскай уобаластан Мииринэй оройуонугар баһаам киһи кэлэр. Оттон Казахстан дьонун манна төрүт ыытааччыта суох. Дьиҥэр, казах омук «Атамекен» общината Мииринэйгэ уруккаттан баар.
Алпыспаевтар, Адылбековтар, Кузембаев, Джамбулов, Еспанбетов, Байкенов диэн шахтаҕа, алмаас хостооһунугар быһаччы сыһыаннаах үлэһит дьону билэттиир, алтыһар этим. Олортон Мииринэйгэ биир-икки киһи хаалла. Бары кэриэтэ дойдуларыгар эбэтэр Арассыыйа киин уобаластарыгар көспүттэр.
Дьэ арай, үүммүт дьылга, экэниэмикэ уонна сир баайын өттүнэн кыахтаах Казахстантан эдэр дьон, Саха сиригэр баахта ньыматынан үлэлии кэллилэр. Бука, дойдуларыгар услуобуйа, үп-харчы боппуруоһа кытаатан, манна кэллэхтэрэ. Оттон оробуочай идэлэргэ манна үлэ баһаам... Алмаас, ниэп, гаас.
Станислав Алексеев. Мииринэй куората.
