Тыа сиригэр үлэ-хамнас көстүбэт кыһалҕата элбэҕэ киһини моһуоктуур. Улуус киинигэр, улахан нэһилиэктэргэ үөрэхтээх өттө үксэ оскуолаҕа, уһуйааҥҥа , балыыһаҕа, хонтуораҕа үлэлиир буоллаҕына, кыра бөһүөлэктэргэ оннук да үлэ суоҕун кэриэтэ.
Муома улууһун Сааһыыр бөһүөлэгэр олорор биэс уол оҕолоох ийэ Юлия Корякина ити кыһалҕаны этинэн-хаанынан билбит киһи. Биэс сыллааҕыта олоҕун аргыһа олохтон туораабыт. Хата, элбэх оҕолоох табаһыт дьиэ кэргэнигэр төрөөн кыратыттан илии үлэтигэр үөрүйэх буолан чаҕыйбатах. Ыстаадаҕа элбэхтик ирдэнэр сыбаарка үлэтин баһылыырга санаммыт.
Инньэ гынан, ааспыт сылга Дьокуускайга элбэх хайысхалаах «Профессионал» диэн кииҥҥэ үөрэнэ, «иккис квалификационнай таһымнаах сыбааркаһыт» идэтин ылбыт. Онтон тус дьыала тэринэргэ сананан, Муома улууһун Нэһилиэнньэ көмүскэллээх буолуутун управлениетыгар тиийбит. Онуоха киниэхэ судаарыстыбаннай социальнай контракт түһэрсэргэ сүбэлээбиттэр. Манна куонкуруһу ааһаары, Муоматааҕы «Мин биисинэһим» киин көмөтүнэн биисинэс-былаан суруйбут, докумуон хомуспут. Дьэ, ол кэннэ тус дьарыктаах быһыытынан бигэргэнэн, тус дьыалатын арыйарга көмө харчы көрүллэн, сыбааркалыыр тэрилин ылыммыт.
Билигин Юлия улууска соҕотох дьахтар сыбааркаһыт. Киниэхэ үксүгэр табаһыттартан наарта уһаарыытыгар сакаас киирэр. Маны таһынан араас диаметрдаах турбалары, хаһаайыстыбаҕа туттуллар тэрили, малы, миэбэли, буран сыарҕатын, о.д.а. сыбааркалыыр.
- Сыбаарка үлэтэ, биллэн турар, сэрэхтээх. Ол эрээри дьахтар хайа баҕарар үлэҕэ болҕомтолоох буолан, барыта этэҥҥэ дии саныыбын. Уонна уолаттарым көмөлөһөн абырыыллар. Хоту сиргэ сылдьар көлө бөҕө буолара ирдэнэр, онон кыһаллабыт аҕай, - диэн Юлия өрөспүүбүлүкэтээҕи «Мой бизнес» киин үлэһитигэр Наталья Добрянцеваҕа кэпсээбит.
Өссө тимири уһаарыыны сэргэ ийэ уолаттарын кытта маска оһуор быһан кэрэ бэйэлээх оҥоһуктары оҥорон таһаараллар эбит. Уолаттара сыбааркаһыт ийэлэринэн сүрдээҕин киэн тутталлар. Улахан уола Юрий бульдозерист, иккис уола Никита автомеханик идэтигэр үөрэнэллэр, кыралар оскуола үөрэнээччилэрэ. Онон уолаттарын дурда-хахха оҥостон сыбааркаһыт ийэ өссө да элбэх идиэйэтин олоххо киллэрэр, тус дьыалатын сайыннарар былааннаах.
