Мииринэй куорат хаарбах дьиэтэ үтүмэн элбэх

Саха сирин үрдүнэн хаарбах дьиэни күрдьүү барыла үлэлээбитэ балачча кэм буолла.

Ол биһиэхэ эмиэ ыытыллар. Бастатан туран, Мииринэй куорат Ленинград бэрэспиэгин, Ойуунускай уулуссатын мас дьиэлэрэ күрдьүллүү испииһэгэр киирэн тураллар. Холобур Ойуунускай уулуссатыгар 25, 26, 28 дьиэлэр курдук. Бу дьиэлэр ааспыт үйэ 50-с, 60-с сылларыгар тутуллубуттара. Мас дьиэлэр үгүстэрэ самнархайдар. Акылааттарыттан, хара муосталарыттан ылата сытыйа-ымыйа тураллар. Туттуллар кэмнэрин номнуо ааспыттар.

2020-21 сыллар сайыннарыгар уонна күhүннэригэр, бэрт аҕыйах да буоллар, эргэ дьиэлэр күрдьүлүннүлэр.

Мииринэй куорат сааххаланар туруктаах, хаарбах дьиэлэрин күрдьүүгэ, аны Сахабыт сирин бырабыытылыстыбата үбү хайдах тыырарын күүтэбит. Ол эрээри, үп-харчы үтүргэнэ баар. Маннык быһыыга-майгыга эргэ дьиэлэри күрдьүү былаана туолуо дуо?

Кэнники үс сылга куорат былаастара олохтоохтортон таас дьиэлэргэ кыбартыыралары атыылаһыталыыр буоллулар. Онно ирдэбиллэрэ кытаанах – кыбартыыра үчүгэй туруктаах, булгуччу өрөмүөннэммит, итии-тымныы ууга усчуотчуктаах буолуохтаах. Оттон олохтоохтор үйэлэрин самнархай дьиэлэргэ моҥуохтарын баҕарбаттар.

Онон, хайдах кыалларынан дьону ордук усулуобуйаҕа – таас дьиэлэргэ көһөрүү былаастар сүрүн соруктарынан буолар.