Кулун тутар 24-25 күннэрэ – Дьокуускай куоракка Чурапчы улууһун күннэрэ.
Санатар буоллахха, улуус уонна киин куорат дьаһалтата сир-уот, дьиэ сыһыаннарыгар, тыа хаһаайыстыбатыгар, тутууга, үөрэҕириигэ, эдэр ыччат бэлиитикэтигэр, физическэй култуураҕа уонна успуорка, култуураҕа уонна ускуустубаҕа икки өттүттэн үлэлэһэр сөбүлэҥҥэ илии баттаабыттара.
Саха НКИХ «Саҥа күн» сарсыардааҥҥы бырагыраамматыгар Чурапчы оройуонун баһылыга Степан Саргыдаев социальнай, экономическай сайдыы, буола турар үлэ-хамнас уонна куорат олохтоохторугар анаммыт тэрээһиннэр тустарынан сырдатан кэпсээбитэ. Маны таһынан, официальнай дэлэгээссийэ анал бырагыраамматын таһынан, киин куорат олохтоохторугар уонна ыалдьыттарыгар кулун тутар 25 күнүгэр, күнүс 11 чаастан Орджоникидзе болуоссатыгар Чурапчы улууһун күннэрин үөрүүлээх арыллыыта буолуоҕа, оттон Саха сирин национальнай бибилэтиэкэтигэр И.Н. Винокуров кинигэтин сүрэхтэниитэ буолуоҕа. Маны сэргэ, Петровскай уулуссатыгар баар И.Е. Винокуров пааматынньыгын иннигэр Сэргэни туруоруу сиэрэ-туома ыытыллыаҕа.
«Ил Түмэн» Судаарыстыбаннай мунньах дьокутааттарын, кэмитиэттэр бэрэссэдээтэллэрин кытта Чурапчы улууһун мунньаҕын дьокутааттара, официальнай дэлэгээссийэ «Хатыҥ чараҥ» устудьуоннар сүбэлэрин уонна Дьокуускайга Чурапчы улууһун олохтоохторун түмсүүлэрэ көрсүһэр кэмнэригэр, улуус сайдыытын туһугар уһулуччу суолталаах боппуруостар көрүллүөхтэрэ.
Түмүккэ, П.А. Ойуунускай аатынан Саха академическай тыйаатырыгар «Маарыкчаан ыччаттара» испэктээк буолуоҕа.
Чурапчы улууһун дьаһалтатын пресс-сулууспата ыыппыт матырыйаалыттан
