Социальнай ситимнэргэ олохтоохтор киин куораты ууттан-хаартан босхолуур үлэ олус мөлтөөтө, бадарааҥҥа тимирбит уулусса, тиэргэн элбээтэ, куораппыт наһаа кирдээх диэн кыһыйан-абаран суруйар буоллулар.
Онон болҕомтону куорат киин уулуссаларыгар, түөлбэлэригэр эрэ буолбакка, кырыыба сирдэргэ эмиэ күүһүрдэр уолдьаспыт.
Ол да буоллар, бүгүн күнүс 2 чаастан Дьокуускай куорат тэрилтэлэрэ уонна олохтоохторо үгэс буолбут субуотунньукка тахсаары бэлэмнэнэллэр.
Бары билэргит курдук, кыһын устата хаар анныгар олус элбэх бөх-сах мунньуллар, онтон саас хаар уулуннаҕына тахсан кэлэр.
Субуотунньук биир күнүнэн түмүктэнэн хаалыа суохтаах. Мантан антах тэрилтэлэр субуотунньугу нэдиэлэ ахсын балаҕан ыйын 30 күнүгэр диэри ыытыахтаахтар.
Хайа тэрилтэ хайа сири ыраастыырын туһунан дьаһалы салалта өссө 2021 сыл от ыйын 7 күнүгэр таһаарбыта.
Хаартыска: Дьокуускай куорат уокуругун дьаһалтатын пресс-сулууспата
