Бу туһунан Мииринэй оройуонун баһылыга А.В. Басыров «Алмаастаах кыраай» теле-радио-хампаанньа информационнай биэриитигэр иһитиннэрдэ
Мин «Садын» эбэҥки-национальнай нэһилиэгин дьаһалтатыгар уталыппакка сибээскэ таҕыстым. Дьаһалта үлэһитэ Андрей Константинов миэхэ эппитинэн, Бүлүү өрүскэ түһэр Сүлдьүкээр уонна Куукуйдаах үрэхтэрин күргэлэрэ быйыл ахсынньы ый бүтэһигэр тутуллан бүтэн үлэҕэ киирэллэрэ былааннаммытын бигэргэттэ.
Андрей Константинов биллэрбитинэн, бэдэрээттээх тэрилтэ Сүлдьүкээр үрэҕэр киирии суолу (“Подъездные пути”) оҥоро сылдьар. Маны сааскы халаан уута кимиитэ уустугурдар. Уу таһыма түстэ да күргэ тутуутун үлэтэ тэтимириэхтээх. Муосталар тутууларын Өрөспүүбүлүкэтээҕи Суол пуондата (Дорожный фонд) уонна Мииринэй оройуонун бүддьүөтэ үбүлүүллэрэ быланнаммыта.
Санатан эттэххэ, Светлай бөһүөлэгин уонна Сүлдьүкээри холбуур айан суола тутулла сатаабыта быйыл уон сылын туолар. Бу – баара-суоҕа отут икки биэрэстэ арыттаах сир. Суол ситэ тутуллубатах учаастага Сүлдьүкээр аттыгар сытар. Өр кэм устата тоҕус биэрэстэлээх сири бэрт эрэйинэн дэхсилээтилэр.
Сүрүн харгыстар - сэргэстэһэ сытар икки дохсун үрэхтэр буому үөскэтэллэр. Бу хайа үрэхтэрэ икки хара тыаларыгар тиийэ ууланнахтарына, Светлэйгэ барар суол уурайар, 300-чэ киһи олорор сэлиэнньэтэ хаайтаран хаалар. Итинэн сиэттэрэн, Сүлдьүкээр уонна Куукуйдаах үрэхтэригэр күргэлэр түргэнник-тарҕаннык уонна үчүгэй хааччыстыбалаахтык тутуллан олоххо киирэллэрэ ирдэнэр. Оччоҕуна эрэ саамай кыһалҕалаах олохтоох кырыыба нэһилиэк дьыл ханнык баҕарар кэмигэр быстарыктаммат суолланыаҕа.
Станислав Алексеев. Мииринэй куората.
