Оннооҕор былырыын үлэҕэ киллэриэх курдук туттуу-хаптыы баара. Ону баара бу сүрдээх уустук, элбэх сыраны эрэйэр эбийиэк эбит. Аҥаардас тымныыттан, хахсаат тыалтан харыстыыр боолдьоҕунан бүрүйүүнү туох да олус өр оҥордулар.
Урут суруйбутум курдук бу тутуу сакаасчытынан Мииринэй оройуонунааҕы хоммунаалынай-тутар управлениета буолар.
Бэдэрээччит - Москуба куоракка офистаах ПКО «Техресурс». Маннык үптээх-астаах бэдэрээккэ кыттыы, биллэн турар – балысхан барыыс. Ыйытыаҕы баҕарыллар: “Хаһан Саха сиригэр бэйэлээх бэйэбит тутар-таҥар күүспүт сайдар, улаатар? Уопсайынан, сахалар хаһан улахан таас тутууну толорутук, кимиилээхтик баһылыыбытый?!” - диэн
Эбийиэк үбүлээһинин «АЛРОСА» хампаанньа оҥорор буолан, мантан инньэ үлэ сүрдээх кимиилээхтик барыа диэн эрэл сүҥкэн. Тутуу матырыйаала – дьиэни сылытыыга анаммыт, уокка бэриммэт боолдьох, бүрүйүү билиитэлэрэ, запорнай арматура, сантехника, атын тимир-тамыр, полимер устуукалар кэмигэр тиэллэн кэлэн тутуу былаһааккатын тэниччи сыталлар.
Быйыл саас онон-манан «дьаллайан” турбут сирдэри бөдөҥ шлако-болуоктарынан бүөлээн, тутуу омооно дьэндэйдэ. Ис барааныгар эркиннэри туруоруу, тулааһыны бөҕөргөтүү үлэлэрэ бара тураллар. Бэдэрээччит, билиҥҥитэ, эбийиэги ханнык да өрөбүлэ суох дьэндэтэ сылдьар. Тэтим – орто. Тоҕо диэтэххэ, ыам ыйын саҥатыгар туох да алдьархай күүстээх тыаллар тутааччылары сүгүн-саҕын үлэлэппэтэхтэрэ.
Оҕо Айымньытын Дьиэтэ, 2022 сыл төрдүс кыбаарталыгар үлэҕэ киириэхтээх диэн буолбута. Дьэ хайдах буолар?!
Станислав Алексеев. Мииринэй куората.
