Дьокуускайга турар В.И. Ленин мэҥэ тааһа 1967 с. боруонсаттан кутуллан оҥоһуллубута. Бүттүүн үрдүгэ - 14,6 м, постаменын - 8,5 м, скульптуратын - 6,0 м. Билигин бу регион таһымнаах култуура баайа буолар. Төһө да сорох дьон сөбүлээбэтэхтэрин иһин, устуоруйа кэрэһитэ оннугар хаалар, өссө саҥардыллан, тупсуох кэриҥнээх.
Мэҥэ таас, саҥардыллар күнүн-чааһын кэтэһэн, хаптаһынынан бүтэйдэнэн турбута номнуо төрдүс сыла буолла.
СӨ Судаарыстыбаннай тутууга уонна дьиэни-уоту көрөр управлениетын пресс-сулууспата В.И. Ленин мэҥэ тааһын саҥардан оҥоруу саҕаламмытын уонна икки түһүмэҕинэн барарын туһунан иһитиннэрдэ. Ол курдук, бастакы түһүмэх - 2022 сыл балаҕан ыйыгар диэри, иккис түһүмэх - 2023 сыл ахсынньы ыйыгар диэри. Билигин улахан үлэҕэ киирэргэ бэлэмнэнии бара турар. Онон, улуу сирдьит саҥардыллыбыт мэҥэ тааһын көрүөхпүт өссө да ыраах.
«Бырайыак быһыытынан мэҥэ таас акылаатын саҥардыы, постамент уонна трибуна гранит билиитэлэрин, сибэкки кулуумбаларын бетонун уларытыы, ууну хомуйар лотоктары ууруу, болуоссат асфалын саҥаттан бүрүйүү барыахтаах. Скульптураны ыраастаан, дьиэктэрин туоратан баран, тас дьайыыттан харыстыыр дуйунан бүрүйүөхтэрэ», - диэн тэрилтэ салайааччыта Павел Аргунов быһаарбыт.
Хаартыска: regionnews.ru
