Ардах халааныттан эмсэҕэлээбит Үөһээ Дьааҥы улууһугар тыа хаһаайыстыбатыгар хоромньу 11,5 мөл. солк. тахсыбыт. Бу туһунан ТХМ пресс-сулууспата иһитиннэрэр.
“Быһа барыллаан, тыа хаһаайыстыбатыгар тахсыбыт хоромньу 11 851 751 солк., ол иһигэр тыа хаһаайыстыбатын култууралара өлүүтүттэн – 931 300 солк., тыа хаһаайыстыбатын кыылларын өлүүтүттэн – 359 426 солк., инфраструктура кээһэниититтэн – 6 995 129 солк., матырыйаалынай сыаннас – 3 295 896 солк.”, — диэн иһитиннэриигэ суруллар.
Халаантан 6 хотон, сүөһү өлөрөр сыах, үүт тутар пуун уонна 3,53 хортуоппуй бааһыната эмсэҕэлээбит. Маны таһынан 661 туонна от, ол иһигэр 649,5 туонна кур от, быйылгы 11,5 туонна от ууга былдьаммыт. 7 сылгы уонна 38 куурусса өлбүт.
“Хоромньуну ааҕарга хамыыһыйа эмсэҕэлээбит эбийиэктэри көрөр, аактары, симиэтэни оҥорор. Халаан таһаарбыт хоромньутун чопчу сыыппарата матырыйааллары сыныйан үөрэтии кэннэ бигэргэниэҕэ”, — диэн иһитиннэриигэ ыйыллар. Маны сэргэ өрөспүүбүлүкэ эрэсиэрбэ пуондатыттан үбү тыырарга үлэ тэҥинэн ыытыллыаҕа.
Эмсэҕэлээбит эбийиэктэр докумуоннара дойду ТХМ ыытыллыахтара, онно эспиэрдиир хамыыһыйа көрөн, РФ Бырабыыталыстыбатын эрэсиэрбэ пуондатыттан үбүнэн көмөнү оҥорор туһунан быһаарыахтара.
