Арассыыйа Запорожскай уонна Херсонскай уобаластар тутулуга суох буолууларын билиннэ. Маннык ыйаахха Арассыыйа Федерациятын бэрэсидьиэнэ Владимир Путин илии баттаата, докумуоннар бырааптары таһаарар порталга номнуо угуллубуттар Бу туһунан сонуну «Парламентская газета» хаһыат суруйар.
Норуоттар икки ардыларынааҕы быраап нуорматыгар сөп түбэһэн, ООН устаабыгар суруллубутунан, тэҥ бырааптаах буолуу уонна норуоттар бэйэлэрэ быһаарыныыны ылынар бириинсиптэри тутуһан, референдум түмүгүнэн олохтоохтор баҕа санааларын учуоттаан туран, маннык быһаарыныы ылылынна диэн саҥа ыйаахтарга сурулла сылдьар.
Оттон Донецкай уонна Луганскай норуодунай өрөспүүбүлүкэлэр тутулуга суох буолууларын Арассыыйа олунньу 22 күнүгэр билиммитэ. Биллэринэн, балаҕан ыйын 23 күнүттэн 27 күнүгэр диэри ДНР, ЛНР, Запорожскай уонна Херсонскай уобаластара субъект быһыытынан Арассыыйа састаабыгар киириилэрин туһунан референдумнар олохтоммуттара. Оттон, балаҕан ыйын 28 күнүгэр куоластааһын түмүгэ биллибитэ. Онуоха, Арассыыйа Федерациятыгар киирии иһин ДНР олохтоохторо 99,23%, ЛНР дьоно 98,42%, Запорожскай уобалас куоластааччылара 93,11% уонна Херсонскай уобалас быыбардааччылара 87,05% куоластаабыттар этэ.
Арассыыйа пресс-сэкэрэтээрэ Дмитрий Песков балаҕан ыйын 29 күнүгэр иһитиннэрбитинэн, дойду састаабыгар саҥа территориялары киллэрии туһунан дуогабарга илии баттаныытын церемонията балаҕан ыйын 30 күнүгэр буолуоҕа. Маны сэргэ, Арассыыйа бэрэсэдьиэнэ тыл этиэҕэ.
