Урут, 2014 сыллаахха, Сөдүөт Тумууһаптан “Дьөгүөр Барыыһаптыын быыбарга күөн көрсөн, Ил Дархан дуоһунаһын былдьаһан киирсэҕин дуо?” диэн ыйытан тураллар. Кини онно баартыйа уонна дойду бэрэсидьиэнэ көҥүллээбэтилэр диэн аккаастаммыта. Тумууһап кырдьыгынан эппитэ, регион баһылыга Арассыыйа былааһын биир сүрүн сүһүөҕэ. Онон оҕо оонньуутун курдук быыбары түбэһиэх киһи киирэн кыайара табыллыбат.
Ол быыбарга биэтэккэ Е.Борисов быыбардааччылар – 58,79%, Э.Березкин – 29,5%, хомуньуус В.Губарев –16,8%, Г.Парахин – 3,2%, В.Максимов – 1,34% ылан тиийбиттэрэ.
Ил Дархан Айсен Николаев бу дьыл ахсынньы 25 күнүгэр Намҥа буолбут пресс-конференциятыгар: “Дойду бэрэсидьиэнэ уонна нэһилиэнньэ өйөбүлэ баар буоллаҕына, иккис болдьоххо Ил Дархан дуоһунаһыгар туруохпун сөп”, - диэтэ.
Ахсынньы 21 күнүгэр Ленскэй кулууп түмүктүүр мунньаҕа дойду биллэр бэлииттехнологтарын кытта барбытынан ыйдаҥардан көрдөххө, улахан быыбарга бэлэмнэнии, ол да буоллар, син биир бара турар эбит диэн көрдөрөр.
Ленскэй кулуупка Ил Дархан политтехнологтары кытта мунньаҕа
Оттон норуокка билигин “Ил Дархаммыт дойдуга күбүрүнээтэрдэр ортолоругар бастакы 10 иһигэр сылдьар, онон дойду бэрэсидьиэнэ киһибитин федеральнай кииҥҥэ үрдүк дуоһунаска ылыан сөп” диэн кэпсэтии элбэх.
В.Путин Айсен Сергеевиһы алҕаан ыыттаҕына, кыайара биллэр. Утары турар киһи көстүбэккэ, кини кими эмэ “спойлер”оҥостор кыһалҕата үөскүө дуо?
Оттон киһибитин федеральнай кииҥҥэ ыллахтарына хайыыбыт? Эдэр саха салайааччыта үүнэрэ хайҕаллаах. Кыһалҕата диэн, оччотугар Ил Дархаҥҥа ыйааһыннаах, норуот үксэ өйүүр хандьытаата суох хаалабыт.
Сорохтор: “Ыскааптан Березкин, Губарев, Парахин быыллыйбыт хомуһуолларын” ороон, тэбээн баран кэтэрдэн киирсиһиннэриэхпит буоллаҕа” – диэн саныыллара буолуо. “Уот Сомоҕолор”, төһө да холуобунай дьыалаланнар, Мээрикээнэби кытыннарыахпыт диэн эрэҥкэдийэн ылыахтарын сөп.
Онон ыйытыы: ити “быыллыыйбыт хомуһуоллаах” хандьыдааттартан уонна Дьокуускай мээрин быыбарыгар туран хотторбут В.Обединнаах В.Федоровтан Ил Дарханы талыахпыт диэн чахчы итэҕэйэр дьон баар дуо?
Салгыы кэтээн көрүөхпүт, туох сонун баарынан Саҥа дьыл кэннэ кэпсэтиэхпит. Кэтэһиҥ.
Бэйэ кэрр.
