Муус устар 18 күнүгэр Арассыыйа Бэрэсидьиэнэ Кылаабынай командующай В.Путин Херсон уобалаһыгар уонна Донбаска бара сылдьан, «Днепр» уонна «Восток» сэриилэрин бөлөхтөрүн ыстааптарыгар байыаннайдары кытта мунньахтаата. Путин саҥа холбоспут эрэгийиэннэргэ иккис сырыыта. Бастаан кулун тутарга Мариупольга сылдьыбыта.
Сорох дьон “бэрэсидьиэни РФ оборуонатын миниистирэ С.Шойгу, РФ Сэбилэниилээх күүстэрин генеральнай ыстаабын начаалынньыга В.Герасимов тоҕо арыаллаабатылар, В.Путин тоҕо бөртөлүөтүнэн аҕыйах харабыллаах сырытта?” диэн ыйыталлар. Бэрэсидьиэн итинник гынан, кини Үрдүкү главнокомандующай буоларын, эппиэтинэс барыта киниэхэ баарын өссө тоһоҕолоон көрдөрдө диир сөп. Аҕа дойдуну көмүскүүр сэрии кэмигэр Сталин эмиэ итинник дуоһунастааҕа, фроҥҥа бара сылдьарыгар ханнык да нарком арыаллаабат этэ диэн суруйаллар.
В.Путин сэриилэргэ икки өттүттэн сотору быһаарыылаах киирсии буолуо диир кэмнэригэр бара сырытта. Өйдүүргүт курдук, бу кыһыны быһа арҕаа дойдулар, Украина бэйэтэ улахан сууһарыылаах кимэн киирии буолуоҕа диэн айдааран аҕай кэллилэр. Бу 1943 с. Гитлер Курскайдааҕы тоҕойго Сталин аармыйаларын хампарытан, Сэбиэскэй Сойууһу кытта сэрии дьылҕатын быһаарарга санаммытын курдук, улахан кыргыһыы буолуо дииллэр.
Украиналар арҕаа дойдулар кигиилэринэн, кинилэр сэриилэрин сэбинэн сэбилэнэн, биһиги сэриилэрбитин үлтүрүтэн Кырыымы ылыахпыт, Арассыыйаны хотуохпут диэн сааналлар. Кимэн киирии муус устарга диэбиттэрэ да, Украинаҕа үһүс нэдиэлэтин тохтообокко ардах түһэр, Днепр, атын да өрүстэрэ халаан бөҕө, сир-дойду ууга баран сытар. Маннык балаһыанньаҕа кимэн киирии табыллыбат.
Оттон Арассыыйа кимэн киириитэ ыам ыйын 9-н кэннэ саҕаланыа диэн сабаҕалыыллар. Биһиэннэрэ сылтан ордук кэмҥэ өстөөх күүһүн өһүлэр, кыаҕын эһэр таактыканы тутуһа сырыттылар. Баҕар, ол таактыка салҕаныа.
Идэмэрдээх өйдөөх арҕаалар өссө тугу бэлэмнээн олороллоро биллибэт. Соторутааҕыта Зеленскэй Польша бэрэсидьиэнэ А.Дуданы көрсөн, туох эрэ кистэлэҥ сөбүлэҥ түһэрсибиттэр диэн уорбалыыллар. Ол көрсүһүү кэннэ Зеленскэй Украина уонна Польша икки ардыгар кыраныысса суох буолуо диэн эппитэ. Ол аата, Украинаны Польшаҕа киллэрэн, биир судаарыстыба оҥороору гыныахтарын сөп. Оччоҕо Польша НАТО-ҕа киирэринэн сылтаҕыран, Арассыыйаны утары НАТО-лары сэриигэ тардаары гыналлар дуу?
Араас дойду биллэр көрбүөччүлэрэ бары арҕаалары утары охсуһууга Арассыыйа кыайыа дииллэр. ЛНР-га олорор, Ванганы кытта тэҥниир хараҕа суох Н.Тарасенко диэн киһи НТВ-га 2024 с. Пасхатыгар кыайыы бүтэһиктээхтик олохтонуо диир. Халлаан дьоно туойаллара төһө кырдьыгын ким билиэй? Ол эрээри бу кырдьаҕас биһиги билигин түмсүбэккэ, сомоҕолоспокко сылдьабыт, норуоппутун баайынан уонна информациянан ыһан олороллор диэн, кырдьыгы эттэ. Кырдьык, дойду чахчы ыарахан тургутууга киирбит кэмигэр бары биир буоларбыт ирдэнэр. Аҕа дойду сэриитин кэмигэр биллиилээх бэйиэт Анна Ахматова сэбиэскэй былаас кэргэнин өлөрбүтүн, уолун хаайыыга укпутун да иһин, норуотун кытта биир буолан, дойдутун таҥнарбатаҕа.
Бэрэсидьиэн Донбаска сылдьар кэмгэр С.Шойгу Москубаҕа Кытай оборуонатын миниистирэ Ли Шанфуну кытта кэпсэппит, сөбүлэҥ түһэрсибиттэр. Бу кэмҥэ соһуччу РФ Чуумпу акыйааннааҕы флотугар суһал бэрэбиэркэ ыыттылар.
Кырдьык, аан дойдуга иккис улахан тыҥааһын Тайваҥҥа тахсыах чинчилээх. Бу муус устарга Тайвань салгыннааҕы, уутааҕы кыраныыссаларын Кытай уонунан сөмөлүөттэрэ, хараабыллара элбэхтик кэспиттэр. Си Цзиньпин байыаннайдарыгар улахан иирсээҥҥэ бэлэм буолуҥ диэн хас да мунньахха эппит. Кытайга Си аата Мао Цзэдун аатын баһыйан иһэр үһү. Си күүс өттүнэн Тайваны холбоон, Кытай устуоруйатыгар биир судаарыстыбаны туппут салайааччы диэн аатын хаалларар баҕалаах буолуон сөп. Кытай Тайваны сэриилээтэҕинэ, аан дойду балаһыанньата уустугуруон сөп.
Быйылгы сааспыт өссө хайдах буоларын олох көрдөрүө диир буоллахпыт.
Хаартыска: РФ Бэрэсидьиэнин пресс-сулууспата
Владимир Степанов.
