Быйыл күһүн Саха сиригэр Ил Дарханы, Ил Түмэн дьокутааттарын, кэккэ улуустарга баһылыктары талыахтаахпыт. Оттон 2023 сыл от ыйын 1 күнүнээҕи туругунан, өрөспүүбүлүкэ үрдүнэн барыта 641 592 быыбардааччы баар.
Саха сирин Киин быыбардыыр хамыыһыйатын чахчыларынан, өрөспүүбүлүкэҕэ саамай элбэх быыбардааччы киин куоракка олорор – 198 284 киһи. Жатай территориятыгар 5 645 быыбардааччы бэлиэтэммит. Онон, Дьокуускайга уонна Жатайга Саха сирин быыбардааччытын 31,8 %-на олорор диэххэ сөп. Иккис элбэх быыбардааччылаах улуус – Нерюнгри. Онно 51 655 киһи бэлиэтэммит. Үһүс миэстэҕэ Мииринэй улууһа тахсар – 49 459 киһи. Төрдүс уонна бэһис миэстэлэргэ Алданнаах Ленскэй киирэллэр – 28 205 уонна 26 131 быыбардааччы.
Тыа хаһаайыстыбатынан дьарыктанар улуустартан саамай элбэх быыбардааччылаах Мэҥэ Хаҥалас буолар – 25 045 киһи. Ити кэннэ Хаҥалас кэлэр – 22 610, үһүс – Ньурба – 17 711. Оттон саамай аҕыйах быыбардааччы, биллэн турар, хоту олорор. Аллайыахаҕа – 1746, Эбээн Бытантайга – 2046, Анаабырга – 2361.
Быйыл дойду Киин быыбардыыр хамыыһыйатын быһаарыытынан, быыбар үс күн устата ыытыллыахтаах. Ол курдук, балаҕан ыйын 8-с, 9-с, уонна 10-с күннэригэр куоластыахпыт. Учаастактар сарсыарда 8 чаастан киэһэ 20 чааска диэри үлэлиэхтэрэ.
Даҕатан эттэххэ, быйыл Ил Дархан быыбара, кэлиҥҥи сыллары кытта тэҥнээтэххэ, хаһааҥҥытааҕар даҕаны сытыытык барар чинчилээх. Ил Дархан дуоһунаһыгар инньэ 8 баартыйа хандьыдаатын туруорбут:
- Биир ньыгыл Арассыыйа – Айсен НИКОЛАЕВ;
- Биэнсийэлээхтэр баартыйалара – Владимир ТИМОФЕЕВ;
- Арассыыйа хомуньуустара – Игорь БОРИСОВ;
- От күөхтэр – Александр ВАКАРЬ;
- Гражданскай Платформа – Юрий ПШЕННИКОВ;
- Төрөөбүт дойду – Олег МАКЛАШОВ;
- КПРФ – Виктор ГУБАРЕВ;
- ЛДПР – Гаврил ПАРАХИН.
КБХ саайтыттан быһа тардан.