Сэтинньи 13 күнүгэр, эмискэ да, соһуччу да диэххэ, Үөһээ Бүлүү улууһун территориальнай быыбардыыр хамыыһыйата (ТБХ) сэтинньи 19 күнүгэр улуус баһылыгын талар быыбары ыытар туһунан быһаарыы таһаарда.
“Бээрэ, хайдах хайдаҕый? Михалевтаах Николаевы суут туораппыта дии, саҥаттан быыбар тэриллэр буолбатах дуо?” диэн дьон муодаргыан муодаргыыр.
Сокуон хаамыытынан көрөбүт.
Улуус суутунан туоратыллыбыт хандьыдааттар тута ааһымматахтар. Сокуон ирдэбилин, болдьохтору бэркэ үөрэппиттэр быһыылаах. Тоҕо диэтэххэ, Үөһээ Бүлүү ТБХ-та уонна уһуллубут хандьыдааттар тиһэх күннэргэ күүскэ хамсаммыттар. Михалевтаах Николаев ааһыныыга биэрбиттэр. ТБХ быыбары ыытар быһаарыы ылар. ТБХ быһаарыыта сокуону кэспэт дииллэр. Быыбары тохтотор суут уурааҕа суох, оттон гражданнар инники анаммыт быыбар күнүгэр быыбардыахтаахтар.
Суутунан уһуллубут икки киһи Үрдүкү Суукка ааһыммыттарынан, сокуонунан кинилэри улуус баһылыгын хандьыдаатыттан ким да, туох да туоратар, устар бырааба суох. Арай бу нэдиэлэ бүтүүтэ Үрдүкү Суут ыытыллан, улуус суутун уурааҕын өйөөтөҕүнэ, биирдэ хандьыдааттаан бүтэллэр.
Сокуон илиитэ-атаҕа тиийбэт аҕыйах хонугун икки ардыгар түбэһиннэрэн, түөрүйэ быһыытынан куолулаатахха, быыбар буолан да хаалыан, Үөһээ Бүлүү улууһун баһылыга талыллыан да сөп курдук.
Үрдүкү Суут түргэтээбитэ сэтинньи 16 к. чэппиэргэ көрүөн сөп. Өскөтүн Үрдүкү Суут улуус суутун уурааҕын оннунан хааллардаҕына, В.И. Алексеев баһылыкка соҕотох хандьыдаат хаалар. Быыбар саҥа болдьоҕо ананыахтаах. Баһылык дуоһунаһын былдьаһар саҥа хандьыдааттар регистрацияланаллар. Ол иһигэр, ити туоратыллыбыт дьон кыттар бырааптаахтар.
Оттон Үрдүкү Суут улуус суутун уурааҕын көтүрдэҕинэ, Михалев, Николаев, Алексеев үһүөн хандьыдаат буолан, быыбар сэтинньи 19-гар ыытыллара сокуоннай буолар. Үрдүкү Суут Михалевтаах Николаевтан хайаларын эрэ хандьыдаатынан хааллардаҕына, икки хандьыдааттаах быыбар ыытыллыан сөп. Ол эрээри, эриэхэбэйэ итинэн бүппэт. Үрдүкү Суут кэннэ хаалбыт икки хандьыдааттан хайалара эрэ устуннаҕына, быыбар эмиэ көһөрүллэр.
Аны туран быыбар ахсынньыга ыытыллыа эмиэ мунаах. Сокуонунан хандьыдааттар туруорунар болдьохторо балачча уһун. Онон ахсынньыга буолбакка, тохсунньу бүтүүтүгэр да көһүөн сөп. Ону даҕаны эмиэ атын сууттааһыыта, туоратыһыыта суох аастаҕына.
Кэлэр сыл халандаарын көрдөххө, бэрэсидьиэн быыбарын мэһэйдээбэккэ, тохсунньу 21 эбэтэр 28 күннэригэр ыытыллыан сөп. Түөрүйэ быһыытынан.
Владимир Степанов.
Сэҥээриилэр