Бэҕэһээ, олунньу 8 күнүгэр, Ил Дархан Айсен Николаев судаарыстыбаннай былаас кэккэ дуоһунастарыгар саҥа салайааччылары, салайааччылар солбуйааччыларын анаата. СӨ Ил Дарханын уонна бырабыыталыстыбатын пресс-сулууспата иһитиннэрэринэн, саҥа үлэҕэ биэс киһи көспүт.
СӨ Тыа хаһаайыстыбатыгар миниистирин бастакы солбуйааччытынан Анна Александровна Стручкова анаммыт. Бу иннинэ кини СӨ Инвестицияны тардыыга уонна эскпорды өйөөһүҥҥэ ааҕыныстыбатын генеральнай дириэктэрэ этэ.
А.А. Стручкова үрдүк үөрэхтээх, Арассыыйатааҕы норуоттар доҕордоһууларын университетын, Уһук Илиннээҕи судаарыстыбаннай сулууспа академиятын, РФ Бэрэсидьиэнигэр Норуот хаһаайыстыбатын уонна судаарыстыбаннай сулууспа Арассыыйатааҕы академиятын бүтэрбит. Үлэтин 1989 сыллаахха Болугур сельпотун экэнэмииһинэн саҕалаабыт. Кэккэ кэмҥэ Дьокуускай дьаһалтатыгар, Дьокуускайдааҕы салгын пуордугар, Ил Дархан уонна бырабыыталыстыба дьыалаларын управлениетыгар үлэлээбит.
СӨ Судаарыстыбаннай тутууга уонна дьиэ-уот надзоругар управлениетын салайааччытын бастакы солбуйааччытынан Галина Геннадьевна Новикова анаммыт.
Г.Г. Новикова үрдүк үөрэхтээх, “Бочуот знага” уордьаннаах А.И. Микоян аат. Куйбышевтааҕы тутуу институтун бүтэрбит. Үлэтин 1984 с. Дьокуускай куорат Архитектураҕа уонна куораты тутууга управлениетыттан саҕалаабыт. Кэлин, 2015 сылтан, СӨ Архитектураҕа уонна тутууга миниистирин солбуйааччынан, 2018 с. тутуу миниистирин бастакы солбуйааччынан үлэлээбит.
СӨ Тутууга миниистирин бастакы солбуйааччытынан бу иннинэ көннөрү солбуйааччынан үлэлии сылдьыбыт Евгений Егорович Афанасьев анаммыт.
Е.Е. Афанасьев М.К. Аммосов аатынан ХИФУ-га “бырамыысыланнай уонна гражданскай тутуу” салаатын бүтэрбит. Үлэтин 2010 сыллаахха “Авангард” СПК ХЭУо инженер-тутааччытынан саҕалаабыт уонна 2019 сыллаахха миниистир солбуйааччытыгар тиийэ үүммүт.
СӨ Үпкэ миниистирин бастакы солбуйааччытынан Лариса Афанасьевна Павлова анаммыт.
Л.А. Павлова Санкт-Петербурдааҕы экэниэмикэ уонна үп университетын “норуот хаһаайыстыбатын былааннааһын, экэниэмикэ” идэлээх бүтэрбит. Үлэтин 1992 с. СӨ Тас сибээскэ министиэристибэтин эрэгийиэннэр сыһыаннаһыыларын отделын сүрүннүүр исписэлииһинэн саҕалаабыт. Ол кэннэ Үп министиэристибэтигэр көһөн, араас дуоһунаска үлэлээбит. Ол иһигэр 2014 сылтан күн баччатыгар диэри Үп министиэристибэтин департаменын салайбыт.
СӨ Нэһилиэнньэ дьарыктаах буолууга судаарыстыбаннай кэмитиэтин бэрэссэдээтэлин солбуйааччытынан Георгий Иванович Борисов анаммыт.
Кини М.К. Аммосов аатынан Саха судаарыстыбаннай университетын уонна Уһук Илиннээҕи судаарыстыбаннай сулууспа академиятын бүтэрбит. Үлэтин Мэҥэ Хаҥалас улууһун Төҥүлү орто оскуолатыгар биология учууталынан, үөрэх управлениетын методиһынан, Өрөспүүбүлүкэтээҕи интэринээт-лиссиэй дириэктэри иитэр үлэҕэ солбуйааччытынан саҕалаабыт. Кэккэ сылларга СӨ Үөрэххэ министиэристэбитигэр, АГИКИ-га, Аллараа Бэстээхтээҕи тырааныспар техникумугар үлэлээбит. Дарыктаах буолуу кэмитиэтигэр 2017 сыллаахха үлэҕэ кэлбит.
СӨ Юстицияҕа судаарыстыбаннай кэмитиэтин бэрэссэдээтэлин солбуйааччытынан Алия Валерьевна Скрябина анаммыт.
Кини Землеустройство судаарыстыбаннай университетын юрист идэлээх бүтэрбит. Үөрэҕин бүтэриэҕиттэн, идэтинэн ГУП Саха НИИ гипроземҥа, “Сахагипрозем” ААУо-ҕа, СӨ Экэниэмикэҕэ уонна бырамыысыланнаска министиэристибэлэригэр, Ил Дархан уонна бырабыыталыстыба дьаһалтатын Социальнай сайдыыга департаменыгар, СӨ бырабыыталыстыбатын бэрэссэдээтэлин сэкирэтэрийээтигэр үлэлээбит.
КНР РФ Атыыга-эргиэҥҥэ бэрэстэбиитэлистибэтин иһинэн үлэлиир СӨ бэрэстэбиитэлин солбуйааччытынан Лина Даниловна Петрова анаммыт.
Л.Д. Петрова Благовещенскайдааҕы судаарыстыбаннай педогогическай университеты уонна М.К. Аммосов аатынан ХИФУ-ну бүтэрбит. Үөрэҕин кэннэ ХИФУ омук тылын институтугар, “Туймааданефтегаз” тэрилтэҕэ, СӨ Инвестицияны тардыыга уонна экспорды өйөөһүҥҥэ ааҕыныстыбатыгар, Норуоттар икки ардыларынааҕы Артика оскуолатыгар, кэлин СӨ Экспорды өйүүр киинин генеральнай дириэктэринэн үлэлээбит.
СӨ Бырабыыталыстыбатыгар ЗАГС салайааччытынан Дария Васильевна Слепцова анаммыт.
Д.В. Слепцова М.К. Аммосов аатынан СГУ-ну, ХИФУ-ну, кэлин Үлэ уонна социальнай сыһыан академиятын бүтэрбит. Үлэтин СӨ Ил Дарханын уонна бырабыыталыстыбатын иһинэн үлэлиир Сокуоннай саастарын туола илик оҕолор уонна кинилэр бырааптарын көмүскүүр биэдэмистибэлэр икки ардыларынааҕы хамыыһыйаттан саҕалаабыт. Кэлин Ил Дархан уонна бырабыыталыстыба дьаһалтатыгар араас дуоһунаска үлэлээн баран, 2022 с. СӨ ЗАГС салайааччытын солбуйааччыта буолбут.
СӨ Инновацияҕа, сыыппара сайдыытыгар уонна инфокоммуникация технологиятын миниистирин солбуйааччы Георгий Петрович Андреев уоппускаҕа барбытынан, кинини солбуйааччынан Александр Андреевич Федотов анаммыт.
А.А. Федотов М.В. Ломоносов аатынан МГУ-ну уонна Кутафин аатынан Москубатааҕы судаарыстыбаннай юридическай университеты бүтэрбит. Үөрэҕин бүтэрэн баран, “ЮРГЭЛ”, “Дальфиш” диэн чааһынай тэрилтэлэргэ, РФ Экэниэмикэ сайдыытыгар министиэристибэтин институтугар, 2018 сылтан СӨ Ил Дарханын иһинэн үлэлиир Стратегиялаах чинчийии киинин салайааччытын солбуйааччытынан үлэлээбит.
Yakutia24/Якутия24 суруйуутуттан
