Бүгүн Арассыыйа бэрэсидьиэнэ Владимир Путин Москуба куоракка дуоһунаһыгар киирэр сиэрэ-туома буолар. Санаттахха, кулун тутар 15 – 17 күннэригэр буолбут быыбарга В.В. Путин куолас 87,28 бырыһыанын ылан, бэһис төгүлүн дойду бэрэсидьиэнинэн талыллыбыта.
Инаугурация Москуба бириэмэтинэн күнүс 12:00 чааска буолар. Ону бары федеральнай ханааллар көрдөрүөхтэрэ. Ол иһигэр “Первый канал”, “Россия 1”, НТВ уо.д.а.
Төрүт сокуоҥҥа сурулларынан, бэрэсидьиэн дьоро түгэҥҥэ бирисээгэ этиэхтээх. Ол тиэкиһэ Төрүт сокуоҥҥа сурулла сылдьар. 2000 сыллаахха диэри судаарыстыба салайааччыта дуоһунаһыгар киирэр сиэрэ-туома Кириэмил Судаарыстыбаннай дыбарыаһыгар буолар эбит буоллаҕына, ол кэннэ Кириэмил Улахан дыбарыаһыгар тэриллэр буолбута.
Инаугурация кэннэ бэрэсидьиэн тыл этиэҕэ. Холобур, 2018 с. сиэр-туом уонна тыл этиитэ барыта чаас курдук салҕаммыта.
ИНАУГУРАЦИЯ КЭННЭ
Сокуон быһыытынан, бэрэсидьиэн дуоһунаһыгар киирбит күнүгэр күн бүгүн үлэлии олорор дойду бырабыыталыстыбатын боломуочуйата тохтуур. Ол бэрэсидьиэн уларыйбытыттан эбэтэр иккиһин талыллыбытыттан тутулуга суох. Бары урукку миниистирдэр саҥа кэбиниэт тэриллиэр уонна бигэргэниэр диэри “эбээһинэһи толорооччу” диэн ыстаатыстаах салгыы үлэлииллэр.
2020 с. Төрүт сокуоҥҥа киирбит уларыйыы быһыытынан, бырабыыталыстыба бэрэссэдээтэлин, вице-премьердэри уонна миниистирдэр улахан аҥаардарын Судаарыстыбаннай Дуума бигэргэтэр. Арай ИДьМ, МЧС, оборуона, МИД уонна Минюст миниистирдэрин Федерация Сэбиэтин кытта сүбэлэһэн баран, бэрэсидьиэн бэйэтэ аныыр. Сылыктыылларынан, уларыйыы-тэлэрийии ыам ыйын бүтүөр диэри барыахтаах.
