“Нью-Йорк Таймс” хаһыат оҥорбут ыйытыгын түмүгүнэн, АХШ бэрэсидьиэнигэр хандьыдаат Дональд Трамп утарылаһааччыта Джо Байдены биэс штатка куоһаран иһэр. Аризона, Джорджия, Мичиган, Невада уонна Пенсильвания олохтоохторо ордук Трампы өйүүллэр эбит. Кырдьаҕас Байдены Висконсиҥҥа эрэ өйөөбүттэр.
Муус устар 28 күнүттэн ыам ыйын 9 күнүгэр диэри ыытыллыбыт ыйытыкка барыта 4 097 анал бэлиэтэммит куоластааччы кыттыбыт. Хаһыат суруйарынан, араастаһыы аахсыйа ырыынага улааппытын, Трампы утары тэриллибит суут дьыалалара, Байден дойдуну сатаан салайар-салайбат дьоҕурун, судургутук эттэххэ, аһара кырдьыбытын кытта сибээстээх буолуохтарын сөп.
Эмиэрикэ бэрэсидьиэнин быыбара быйыл күһүн сэтинньи 5 күнүгэр буолуохтаах. Трамп даҕаны, Байден даҕаны дэлэгээт сөптөөх куолаһын ылан, быыбарга кыттар санаалаах сылдьаллар.
Бэй.кэр.
Хаартыска: Reuters
