Ил Дархан Айсен Николаев Ил Түмэн дьокутааттарыгар Анал туһаайыытыгар СӨ Ил Дарханын уонна бырабыыталыстыбатын дьаһалтатыгар уонна СӨ Ыччат бэлиитикэтин министиэристибэтигэр 2025 сылтан Инновациялаах менеджмент үрдүкү оскуолатын иһинэн “Время героев” өрөспүүбүлүкэтээҕи каадыр бырагырааматын үлэлэтэргэ соруйда.
АБДь кыттыылаахтарын сайдыытыгар аналлаах “Время героев” бэрэсидьиэн бырагырааматыгар Арассыыйа Дьоруойа Игорь Юргин кыттыбыта. Ахсынньы 14 күнүгэр буолбут “Ньыгыл Арассыыйа” баартыйа сийиэһигэр Владимир Путин ити бырагыраама эрэгийиэннэргэ эмиэ сайдыахтааҕын туһунан эппитэ.
“Улуус уонна куорат уокуругун баһылыктарыттан баһылыгы ботуруйуоттуу иитиигэ солбуйааччыларынан АБДь кыттыылаахтарын анааҥ диэн көрдөһөбүн. Өрөспүүбүлүкэбитигэр анал байыанньай дьайыы кыттыылаахтарын салайар үлэҕэ-хамнаска сыһыарар кыах баар буолуохтаах. Кинилэр быһаарыныылаах санаалара, төрөөбүт ийэ дойдуларыгар бэриниилэрэ эйэлээх олоххо, төрөөбүт Сахабыт сирин сайдыытыгар эмиэ булгуччу туһалыахтаах”, – диэтэ Ил Дархан.