Дойду бэрэсидьиэнэ 4,5 чаастаах сылы түмүктүүр пресс-кэмпириэнсийэтигэр 76 араас ыйытыы киирдэ. Владимир Путин сорох ыйытыыга сиһилии, сороххо бэрт түргэник хоруйдаата. Онтон аҕыйах хоруйу кылгастык билиһиннэрдэххэ.
Арассыыйа аармыйата аан дойду саамай бэлэмнээх аармыйата.
Арҕааҥҥы дойдулар ханнык даҕаны байыаннай тиһиктэрэ “Орешнигы” тохтотор да, суулларар да кыахтара суох.
Анал байыаннай дьайыы кыттыылаахтара көрүллэр төлөбүрү бары булгуччу ылыахтара. Бэл, “ааспыт күнүнэн” (задним числом).
Арассыыйа сэбилэниилээх күүстэрэ Курскай уобаластан Украина байыаннайдарын туох да саарбаҕа суох үтэйиэхтэрэ.
Киев эрэсиимэ хас да төгүл Арассыыйаҕа террактары оҥорбута. Биир да арҕааҥҥы дойду ону омнуолаабата.
Миграннар Арассыыйа төрүт үгэстэрин ытыктыахтаахтар. Ону быраабы араҥаччылыыр уорганнар хонтуруоллуохтаахтар.
Дойду оборуонаҕа министиэристибэтэ АБДь билиэҥҥэ түбэспит кыттыылаахтарын дьиэ кэргэннэригэр көрүллэр төлөбүрү түргэтэтиэхтээх.
Сарсын тутаах ыстаапка хас буолара биллибит эрээри, дойду Киин баана быһаарыыны ырытан-ыраҥалаан көрөн баран ылыныахтаах.
Путинтан кини кэбиниэтигэр ким мэтириэтэ ыйанан турарын туһунан сурапсыттарыгар, судаарыстыба салайааччыта “биир кэбиниэппэр – таҥара мэтириэтэ, иккиспэр – Ломоносов киэнэ” диэн хоруйдаата.
Путин бэйэтэ эппитинэн, кэлин дьээбэлэнэрэ, күлэрэ биллэ аҕыйаабыт.
Ленин хаһан сиргэ көмүллүөн сөбүн туһунан ыйытыыга манны хоруйдаата: “Хаһан эрэ уопсастыба ити кэпсэтиигэ тиийиэҕэ. Ол гынан баран, билигин Арассыыйаҕа уопсастыба санаатын хайытар быһаарыныылар ылыныллыа суохтаахтар”.
Дойду бэрэсидьиэниттэн содур киинэ (порнография) саайтарын сабарга көрдөстүлэр. Онуоха кини маннык хоруйдаата: “Содур киинэ саайтарын аан дойдуга барытыгар көрөллөр, ол кэннэ кэтилиэт сакаастаан сииллэр. Ити биһиги эрэ кыһалҕабыт буолбатах. Онон, дьоҥҥо содур киинэ саайтарынааҕар туох эрэ атын интэриэһинэйи көрдөрүөххэ наада. Киһи ону көрөн аралдьыйарын уонна көрө туруон баҕарарын курдук”.
В.Путин Киин баан тутаах ыстаапката хас буолуоҕун, бэл, Набиуллина бэйэтэ да билбэт диир.
Жироновскай көрбүөччү буолбатах этэ эрээри, кини эппитэ туолан иһэр. Бэрэсидьиэн бэлиэтээбитинэн, Жириновскай Аан Илин боппуруостарыгар киэҥ, дириҥ билиилээх исписэлиис этэ.
Арассыыйаҕа билиҥҥи Украина нэһилиэнньэтин саҕа ахсааннаах украинец олорор.
Путин Грознайы олус кыраһыабай куорат, аныгы Арассыыйа дьиктитэ (чудо) диэн сыаналаата.
Авиа-хампаанньалар тарыыбынан оонньоон, манипуляциялаан бүтүөхтээхтэр.
Дьиэ кэргэн ипотеката оннунан хаалыа, ол гынан баран, дьиэ кэргэни өйүүр миэрэбит өссө да аҕыйах.
Арассыыйаны кытта НАТО бары кэриэтэ дойдулара кыргыһа олороллор.
Путин Дональд Трампы кытта хаһан баҕарар көрсөргө бэлэм. Бэрэсидьиэн кинини кытта көрсүбэтэҕэ түөрт сыл буолбут үһү.
