Муус устар 9 күнүгэр СӨ Ил Түмэнин спикера Алексей Еремеев салайааччылаах норуот дьокутааттарын бөлөҕө Үөһээ Бүлүү улууһугар кэлэн улуус, нэһилиэк дьокутааттарын, нэһилиэк баһылыктарын кытта көрсөн, үчүгэй ис хоһоонноох, сонун мунньаҕы ыыттылар.
Ил Түмэн олохтоох бэйэни салайыныыга сис кэмитиэтин бэрэссэдээтэлэ Владимир Прокопьев, тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов бэйэлэрин кэмитиэттэрин үлэтин хайысхатынан иһитиннэрии оҥордулар.
Владимир Михайлович олохтоох бэйэни салайыныы саҥа сокуона киириитигэр нэһилиэктэргэ бэриллэр боломуочуйалар бары үбүлэнэллэригэр үлэлэһиэхпит диэбитин сөбүлүү иһиттибит.
Мин т/х 2025 сылга “Агростартап” куонкуруhугар 40 мөл. солк. суумалаах үбүлээһин көрүллэрэ, өрөспүүбүлүкэ үрдүнэн 8 эрэ грант бэриллэрэ олох кыра диэн санаабын үллэһинним.
Иккиһинэн, дьокутааттарга агрохайысхалаах оскуолалар хайаан даҕаны оскуола оҕотун үлэҕэ үөрэтэр сылгылаах, ынахтаах, теплицалаах хаһаайыстыбалаах эрэ буоллахтарына үбүлээһин көрүллүөхтээх диэтим. Тоҕо диэтэххэ, “сылгыта, козата даҕаны суох агрохайысхалаах оскуолалар интернеттэн дааннай ылан, оҕонон дакылаат оҥорторон, үлэ барарын курдук көрдөрбүттэригэр, учууталларыгар 40% эбии хамнас биэрэ олороҕут” диэтим. Оттон салгыы “20-тэн тахса сыл сылгы хаһаайыстыбалаах, биэ ыан кымыс лааҕырын үлэлэтэр Балаҕаннаах агрохайысхалаах оскуолатын “малокомплектнай” диэн туоратан, агрохайысхалаах улахан оскуолаларга курдук, учууталларга 40% эбии хамнас көрбөккүт, ити олох сыыһа, онон тэҥэ суох балаһыанньа тохтуохтаах” диэн этинним.
Балаҕаннаах нэһилиэгин агрохайысхалаах оскуолатын дириэктэринэн Степан Жендринскэй үлэлиир эрдэҕинэ, Үөһээ Бүлүү бөһүөлэгин Марк Егоров аатынан 2 нүөмэрдээх оскуолата Балаҕаннаах оскуолатыгар 7 сылгылана сылдьыбыта, 2 сыл устата оҕолорун кымыс лааҕырыгар сырытыннарбыта. Исидор Барахов аатынан 1 нүөмэрдээх оскуола завуһа Дмитрий Стручков эмиэ үлэлэһэ сылдьыбыта.
АБДь-нан сибээстээн, үбүлээһин уустуктардааҕын билэбит. Онон хайаан даҕаны оскуола оҕотун үлэҕэ-хамнаска үөрэтэр инниттэн, өрөспүүбүлүкэ үрдүнэн бары агрохайысхалаах оскуолалар сылгы, ынах иитэр подсобнай хаһаайыстыбалаах, ыһыы сирдээх эрэ буоллахтарына эрэ, үбүлээһини биэриэххэ диэн туруорсабыт.
Ону таһынан, Балаҕаннаах нэһилиэгин агрохайысхалаах оскуолата 20-тэн тахса сыл сылгы хаһаайыстыбалааҕын, биэ ыан кымыс лааҕырын үлэлэтэрин учуоттаан, атын улахан агрохайысхалаах оскуолаларга курдук толору үбүлээһини оҥорор ирдэнэрин болҕомтоҕо ылалларыгар көрдөстүм.
Санаа үллэстэрбэр салгыы Ил Түмэн дьокутааттарыгар Ил Дархан Айсен Николаев кэтэх ыал ыанар ынаҕын төбөтүгэр 2021 с. саҕалаан, биэрбит 35 - 37-39 тыһ. солк. субсидия харчытын биэрэр механизма сөптөөҕүн, туһалааҕын тоһоҕолоон бэлиэтээтим.
