Бэс ыйын 8 күнүгэр мээр дуоһунаһыгар хандьыдаат буолуохтаах дьон докумуоннарын тутан бүттүлэр. Ил Дархан барыллаан көрүүтүгэр алта киһи киирэр буолла.
Дмитрий Садовников, СӨ бырабыыталыстыбатын бэрэссэдээтэлин бастакы солбуйааччыта (“Ньыгыл Арассыыйа” баартыйа киллэрбит);
Владислав Созонов, “Чистая Арктика” ХЭУо генеральнай дириэктэрин солбуйааччыта (Муниципальнай тэриллиилэр сэбиэттэрэ киллэрбит);
Александр Северьянов, СӨ байаҥкамаатын суһал-былаанныыр салаатын начаалынньыгын аҕа көмөлөһөөччүтэ, АБДь кыттыылааҕа (“Сиэрдээх Арассыыйа” баартыйа киллэрбит);
Любовь Ахметдинова, Дьокуускай тутууга департаменын аппараатын салайааччытын солбуйааччыта (ЛДПР баартыйа киллэрбит);
Василий Николаев, урбаанньыт (“Саҥа дьон” баартыйа киллэрбит);
Иннокентий Васильев, КПРФ рескомун иккис сэкирэтээрэ (КПРФ киллэрбит).
Ил Дархан уонна бырабыыталыстыба дьаһалтатын салайааччыта Георгий Михайлов СИА-ҕа маннык кэмэнтээрийдээбит:
– Хандьыдааттар сүүмэрдээһини ааһыахтара, уопуттара, салайар, куорат соруктарын быһаарар дьоҕурдара сыаналаныа. Мээрин дуоһунаһыгар хандьыдааттары уопсастыбаннай тэрилтэлэр уонна баартыйалар киллэрдилэр. Бүтэһиктээх быһаарыыны куорат Дууматын дьокутааттара куоластаан таһаарыахтара.
