Ол иннинэ, билигин үлэлии турар сокуоҥҥа олоҕуран, элбэх тиһиктээх үлэ ыытыллыбыта. От ыйын 19 күнүгэр Саха Өрөспүүбүлүкэтин Ил Дархана Айсен Николаев Дьокуускай куорат Дууматын көрүүтүгэр киин куорат баһылыгын дуоһунаһыгар Дмитрий Садовников уонна Владислав Созонов кандидатураларын киллэрбитэ.
Ол кэнниттэн куорат дьокутааттара хандьыдааттары бэйэлэрин кытта кэпсэппиттэрэ. Дьокуускай куорат Дууматын бэрэссэдээтэлэ Альберт Семенов:
“Дьокутааттар хандьыдааттары кытта сирэй көрсөн билсэллэрэ, кэпсэтэллэрэ, кинилэр Дьокуускай куорат кэнэҕэски сайдыытыгар туох көрүүлээхтэрин истэллэрэ уонна интэриэһиргиир ыйытыыларын биэрэллэрэ улахан суолталаах этэ. Кэпсэтии олус аһаҕастык, дириҥ ис хоһоонноохтук уонна көдьүүстээхтик ааспыта”, – диэн бэлиэтиир.
Ол кэннэ хандьыдааттары Олохтоох бэйэни салайыныы, сокуоннас уонна регламент сис кэмитиэтин, онтон Куорат дууматын Бүрүсүдьүүмүн мунньахтарыгар көрбүттэрэ, ити кэннэ боппуруос уочарата суох сиэссийэ бэбиэскэтигэр киирбитэ.
“От ыйын 20 күнүгэр дьокутааттар биһиги киин куораппыт кэлэр дьылҕатыгар улахан суолталаах быһаарыыны ылынар буолбуттара. Биһиги хас биирдиибитигэр улахан эппиэтинэс сүктэриллибитэ – бу биһиги бэйэбит эрэ буолбакка, биһигини бэйэлэрин интэриэстэрин көмүскүүргэ итэҕэйэн быыбардаабыт куорат олохтоохторун быыбара буолара”, – диэн Альберт Семенов анаан бэлиэтиир.
Ити кэмҥэ Дьокуускай куорат Дууматын бэрэссэдээтэлин аадырыһыгар Дьокуускай үлэлии олорбут баһылыга Евгений Григорьев бэйэтин баҕатынан болдьоҕун иннинэ боломуочуйатын устунарын туһунан сайабылыанньата хайыы-үйэ киирэн сытара. Ол иһин дьокутааттар сиэссийэ бэбиэскэтин бастакы боппуруоһунан кини сайабылыанньатын көрдүлэр.
Альберт Семенов Евгений Григорьевка уопсай сүбэнэн ыытан кэлбит кыттыгас үлэтин, дьокутааттар куорпустарын кытта көдьүүстээх үлэтин уонна киин куорат сайдыытыгар кылаатын иһин махталын биллэрдэ.
Ол кэннэ дьокутааттар мунньах бэбиэскэтин сүрүн боппуруоһугар – “Дьокуускай куорат” куорат уокуругун баһылыгын талыыга – киирдилэр. Хандьыдааттар дьокутааттар иннилэригэр тахсан куорат сайдыытыгар бэйэлэрин көрүүлэрин, бырагыраамаларын билиһиннэрдилэр.
Илиини өрө уунан аһаҕас куоластааһын түмүгүнэн, мунньахха баар дьокутааттар куоластарын баһыйар үгүс бырыһыанын ылан, Дьокуускай куорат баһылыгынан Дмитрий Дмитриевич Садовников талылынна. Дуума барыта 29 дьокутааттааҕыттан мунньахха 25-һэ баара, онтон 23 дьокутаат Дмитрий Садовников туһатыгар куоластаата. Сиэссийэ түмүгүн таһаарарыгар, Альберт Семенов бу быһаарыы куорат устуоруйатыгар улахан суолталааҕын бэлиэтээтэ.
“Бүгүҥҥү сиэссийэ Дьокуускайга улахан бэлиэ суолталаах. Дьокутааттар саҥа процедура быһыытынан куорат баһылыгын аан бастаан таллылар. Бу талыы бары түһүмэхтэрэ бука бары чопчу сокуон ирдэбилинэн, аһаҕастык уонна муҥутуур чуолкайдык аастылар”, – диэн бэрэссэдээтэл эттэ.
Альберт Семенов Дмитрий Садовниковы саҥа талыллыбытынан эҕэрдэлиирин сэргэ, кини үлэҕэ баай уопута, үөрүйэҕэ киин куорат иннигэр тирээн турар соруктары быһаарыыга улахан көмө-тирэх буоларыгар эрэнэрин эттэ.
“Биһиги иннибитигэр улахан суолталаах сорук турар: куорат инфраструктуратын сайыннарыы, маастар-былааны олоххо киллэрии уонна саҥа социальнай эбийиэктэри тутуу. Дьокуускай куорат салгыы сайдыытын дьокутааттар куопустара, киин куорат дьаһалтата, Өрөспүүбүлүкэбит Бырабыыталыстыбата уонна куорат олохтоохторо бары уопсай сүбэнэн эрэ хааччыйар кыахтаахтар. Биһиги бука барыбыт сүрүн сыалбыт-сорукпут халбаҥнаабат – Дьокуускай куорат олохтоохторун туһугар уонна киин куораппыт инники кэскилин туһугар үлэ”, – диэн бэрэссэдээтэл мунньаҕы түмүктээтэ.
Дьокуускай куорат Дуума пресс-службата
