Соҕуруу Азияҕа турар Бангладеш диэн судаарыстыбаҕа наркотигы кытары күүскэ охсуһан эрэллэр эбит. Ол курдук, наркомааннары эбэтэр ону атыылыыр дьону сууттаан баран, өлөрөргө ыйаахтыахтаахтар. Премьер-миниистир Шейх Хасин Вазед дойдуларын “сытыта турар” наркотигы утары хампаанньа тэрийбит. Түмүгэр ыам ыйыттан саҕалаан полиция 200 киһини туппут уонна өлөртөөбүт.
Ол эрээри былаас бу курдук бэлиитикэ ыытарыттан эмиэ да сэрэхэдийэр. Тоҕо диэтэххэ, Филиппиннэргэ наркотигы кытары эмиэ охсуһа сылдьыбыттара. Лиидэрдэрэ Родриго Дутерте билиммитинэн, наркотигы кытары охсуһаары, 2 сыл иһигэр 4,500 киһини өлөртөөбүттэр. Сорох дьону туох да суута-сокуона суох өлөрбүттэр диэн бэлиэтэнэр. Оттон Аан дойдутааҕы холуобунай суутун дааннайа этэринэн, кыччаабыта, 8 тыһ. киһи, быраабы көмүскүүр атын даҕаны бөлөхтөр бэлиэтииллэринэн, 12 тыһ. тиийэр киһини буруйдаан өлөрбүттэр.
Хайыахтарай, дойду тупсуута сиэртибэни эрэйэр. Филиппиннэргэ буола турар быһылаан түмүгүттэн толлоллор эрээри, Бангладеш тойоно Шейх Хасан куһаҕан дьаллык утары охсуһууну “түмүктээн баран биирдэ тэйиэхпит” диэн тылын биэрэр.
