Кэнники кэмҥэ Арассыыйа улахан куораттарыгар буолар бырачыас аахсыйаларыгар, миитиннэргэ эдэр ыччат, оскуола оҕолоро маассабайдык кыттар буолан эрэллэр. Ону бохсор туһугар, “Биир ньыгыл Арассыыйа” баартыйа кэккэ дьокутааттара саҥа сокуон барылын оҥорон киллэрдилэр.
Онно сокуоннай саастарын ситэ илик оҕолору бу курдук уулусса аахсыйаларыгар ыҥырыы, көҕүтүү, бырапагаандалааһын иһин эппиэтинэс көрүллүөхтээҕэ этиллэр. Ол эбэтэр, ыччаты уулусса аахсыйатыгар тахсарга ыҥырбыт, аҕытаассыйалаабыт дьону 30-50 тыһ. солк. уонна 100 чааска кыһалаҥ үлэҕэ ыстарааптыыллар, эбэтэр 15 сууккаҕа хаайаллар. Өскөтүн ол ыстарааптаммыт киһи кэһэйбэккэ ыччаты иккистээн миитиҥҥэ таһааран тутулуннаҕына, ыстараабын кээмэйэ 150-300 тыһ. солк. буолуон сөп.
Сокуону оҥорбут дьокутааттар санааларынан, “билигин кэккэ бэлитиичэскэй күүстэр быраабы-сокуону утары ыытар дьайыыларыгар оҕолору туһанар буоллулар. Бу сокуон олоххо киирдэҕинэ, сааҥсыйата суох уулусса аахсыйаларыгар оҕолор кыттыылара биллэ көҕүрүө, кинилэр доруобуйаларыгар куттал үөскээбэт буолуо” үһү.
Бу маннык сокуон ылыллар түгэнигэр, мантан антах былаастар миитиҥҥэ кэлбит дьоҥҥо анал бэлэмнээх “бэйэлэрин” провокатор оҕолорун кыттыһыннаран баран, миитини тэрийээччилэри “оҕолору аҕалбыккыт” диэн көҥүл тутар-хабар кыахтаналлар.
Сэҥээриилэр