Ил Дархан Саха сиригэр тылы сайыннарыыга Сэбиэт тэриллэрин туһунан ыйааҕа таҕыста. Ыйаахха Сэбиэт састааба, саҥа балаһыанньата бигэргэннэ.
Санатар буоллахха, СӨ Төрүт сокуонугар өрөспүүбүлүкэҕэ судаарыстыбаннай тылларынан саха уонна нуучча тыллара буолаллар. Аҕыйах ахсааннаах хотугу омуктар тыллара түөлбэлээн олорор сирдэригэр официальнай ыстаатыстаахтар.
Ил Дархан иһинэн тэриллибит тыллары сайынарар Сэбиэт судаарыстыбаннай уонна официальнай тыллары судаарыстыбаннай бэлиитикэҕэ харыстыырга, сайынннарарга, кэҥэтэргэ туһуламмыт. Сэбиэт консультативнай уонна координационнай уорган быыытынан үлэлиэҕэ. Кини тыллары сөпкө туһаныыга судаарыстыбаннай былаас толорор уорганнарын, олохтоох салайыныы, билим, үөрэх уо.д.а. уопсастыбаннай түмсүүлэрин сүрүннүөҕэ. Маны таһынан, Сэбиэт сүрүн соруктарыгар тыл култууратын тупсарыы, тылы сөпкө туттуу, таба суруйуу таһымын үрдэтии уо.д.а. киирэр.
Сэбиэт састаабыгар биллэр тыл үөрэхтээхтэрэ, учуонайдар, эспиэрдэр киирдилэр: ХИФУ Филологическай факультетын декана Галина Жондорова, ХИФУ хотугу тыллар кафедратын сэбиэдиссэйэ Варвара Белолюбская, ГЧИ эбээн филологиятын секторын сэбиэдиссээйэ Сардаана Шарина, ХИФУ саха тылын кафедратын сэбиэдиссэйэ Дария Чиркова, ХИФУ историческай факультетын кафедратын сэбиэдиссэйин солбуйааччы Валентина Акимова уо.д.а. киирбиттэр.
