2018 сылаахха Галина Данчикова 5,1 мөл. солк. дохуоттаммыт. “Биир ньыгыл Арассыыйа” баартыйа чилиэнэ, хотун Даничкова бас билэр дьиэтэ-уота суох. Кини 152,2 кв. м. уонна 80,8 кв.м. иэннэрдээх икки кыбартыыраны куортамнаан олорор. Икки кыбартыыратын кини дьокутааттыырын былаһын тухары куортамныахтаах. Санатар буоллахха, 2017 сыллаахха Галина Иннокентьевна 5,02 мөл. солк. “өлөрбүтэ”.
“Сиэрдээх” Федот Тумусов Данчиковатааҕар кыра дохуоттаммт. Кини былырыын 5 мөл. солк. арыый тахса харчыны өлөрбүт. 2017 сыллааҕыны кытары холоотоххо, Федот Семенович 200 тыһ. солк. кыраын өлөрбүт. Кини бас билиитигэр 24 кв. м. иэннээх гараж уонна гараж учаастага, итиэннэ Toyota Land Cruiser Prado массыыналаах. Кэргэнэ 76,7 кв. м. кыбарыытарын, даача учаастагын уонна икки гарааһы бас билэр.
Сенатор Александр Акимов Тумусовтан 400 тыһ. солк. элбэҕи өлөрөн, былырыын 5,4 мөл. солк. дохуоттаммыт. Кини 1300 кв. м. даача учаастактаах, икки даачалаах, кыбартыыра аҥарын бас билэр уонна Nissan Murano массыыналаах.
Урукку Ил Дархаммыт, билиҥҥитэ сенатордаан олорор Егор Борисов былырыын 12,1 мөл. солк. аахсыбыт. Кини бас билиитигэр 121,6 кв. м. иэннээх кыбартыыра уонна ситэ тутуллубатах гараж баар эбит. Кэргэнин кытары гаарааһы, 1573 кв. м. иэннээх сир учаастагын уонна чааһынай дьиэни үллэстэллэр. Toyota Land Cruiser Prado массыына кэргэнэ Прасковья Борисова аатыгар сылдьар.
Дойду парламентарийдарын ортотугар ааспыт сылга саамай баай сенаторынан Камчаткаттан талыллыбыт Валерий Пономарев буолбут. Кини былырыын 2,346 млрд солк. өлөрбүт. Оттон 2017 сыллаахха баайа “баара-суоҕа” 1,878 млрд солк. этэ. Онно холоотоххо, биһиги дьоммут киһи сиэринэн баайдаахтар эбит.
Муус устар бүтүүтүгэр аны хас биирдии эрэгийиэннээҕи чунуобунньук уонна дьокутаат декларацияны толорон биэриэҕэ. Ол кэннэ ким төһө баайы өлөрбүтүн билиэхпит.
