Арассыыйаҕа тыа хаһаайыстыбатыгар анаммыт киэҥ-нэлэмэн сир сороҕо туһаныллыбакка таах сытар. Онтон сылтаан, тыа сирин дьоно, үлэ суоҕунан сибээстээн куораттарга, киин сирдэргэ көһөргө күһэллэллэр. Госдума аграрнай боппуруостарга кэмитиэтин бэрэссэдээтэлин бастакы солбуйааччыта Владимир Кашин этэринэн, бу кыһалҕаны туоратарга, сирдээх дьон сирдэрин туһаммат буоллахтарына нолуогу уон төгүл үрдэтэр наада диир.
“Элбэх киһи сир бөҕөнү бас билиигэ ылбыта да, онтуларын туһаммакка халтай сытыараллар. Оттон үлэлиэн-хамныан баҕалаах дьон төттөрүтүн сир тиийбэт диэн куораттарга көһөргө күһэллэллэр. Инньэ гынан, бу кыһалҕаны туоратарга миэхэ биир идея көтөн түстэ. Мин санаабар, туһаныллыбат сирдэргэ нолуогу уон төгүл үрдэтиэххэ! Оччоҕуна туһаммат дьон сирдэриттэн баҕа өттүнэн аккаастаныахтара, ол оннугар чахчы наадыйар дьон үлэлиэхтэрэ буоллаҕа”, — диэн сокуону оҥорооччу “Парламентская газета” хаһыакка эппит. Кини Нолуок кодексатыгар уларытыыны киллэрэр уолдьаспытын этэр. Билигин Кашин идеята ырытыыгы сылдьар, ол эрээри дьокутааттар номнуо бу сессияҕа сокуон бырайыагын быһыытынан Госдумаҕа көрөргө бэлэмнэр.
Владимир Кашин идеятын Федерация Сэбиэтигэр эмиэ өйүүллэрин биллэрбиттэр. Палата аграрнай-продовольственнай бэлиитикэтигэр уонна сири туһаныыга кэмитиэтин бэрэссэдээтэлин бастакы солбуйааччы Сергей Лисовской бу этиини өйөөтө уонна арҕааҥы дойдулар уопуттарыгар сигэммит.
“Бу быраактыка аан дойдуга туһаныллар. Холобур, Европаҕа тыа хаһаайыстыбатын сирдэрин туһаммат дьоҥҥо үлүгэр ыстыраабы төлөттөрөллөр. Инньэ гынан, онно хас биирдии сир сыыһа туһаҕа тахсар. Үчүгэй буолбатах дуо?” , — диэн “Пардаментская газета” ыйытыытыгар сенатор хоруйдаабыт.
Борокуруордар бэрэбиэркэлэрин түмүгүнэн, дойдуга тыа хаһаайыстыбатын сирин иэнэ ыллата аччаан иһэр эбит. Холобур, 2017 сыллаахха 56 мөл. гектар сир туһаныллыбатах, ити уопсай тыа хаһаайыстыбатыгар анаммыт сир иэниттэн 14,5 бырыһыаны ылар. Маннык көстүү дойду бары эрэгийиэннэригэр бэлиэтэнэр. Сыл ахсын борокуруордар сир туһаныы эйгэтигэр 10-тан тахса тыһ. сокуону кэһиини булаллар. Ордук сири үллэриинэн, бас билиигэ биэриинэн дьарыктанар чунуобунньуктар истэриттэн ордук элбэх кэһиини булаллар эбит.
