Бүгүн, атырдьах ыйын 30 күнүгэр, Дьокуускай куораттааҕы суукка судьуйа Егорова Дмитрий Саввиҥҥа уонна Александр Уаровка тэриллибит холуобунай дьыаланы салгыы көрдө.
Суукка сүрүн туоһу уонна “бэриги биэрбит”, урукку ТХ миниистирэ, “Сахаплемообъединение” дириэктэрэ Степан Охлопков ыҥырылынна. Ол гынан баран, туоһу уорбаланааччылар албакааттарын ыйытыытыгар бииргэ даҕаны эппиэттээбэтэ, кини “Төрүт сокуонунан мэсктиэлэнэр бырааппын туһанабын, онон бэйэбин утары көрдөрүү биэрбэппин” диэн батынан кэбистэ. Албакааттар “Степан Охлопковка аан бастаан дьыала тэриллэригэр (900 тыһ. солк. итээбитигэр), бастакы көрөдрүүтүгэр “200 тыһ. солк. үүтээн тутуутугар, 400 тыһ. бултуур тэрили атыылаһыыга, 300 тыһ. солк. Москуба эрэстэрээннэригэр, 300 тыһ. солк. представительскэй ороскуоттарга ыыппытым” диэн эппит эбит. Оччотугар тоҕо дьокутааттарга ол харчыттан 900 тыһ. солк. бэриги биэрбитим диирий? Биһиги санаабытыгар, силиэдэбэтэллэр туох эрэ сыаллаах улахан дьайыы оҥорторон, “дьокутааттарга биэрбитим диэ” диэн кикпиттэр” диэн санааны тутустулар.
Суукка уорбаланааччылар салгыы силиэстийэ кэмигэр ханна олороллорун көрдүлэр. Албакааттар “сөптөөҕүн дьиэ хаайыытыгар олордулар, эрэсиими кэспэтилэр, сүрүн туоһу доппуруостанан бүттэ, онон киниэхэ дьайыы эҥин оҥорор кыахтара, баҕалара да суох” диэтилэр. Александр Уаров “дьыала балтараа сылтан ордук барда, суут ханнык быһаарыыны биэрэрин ылынабын” диэтэ. Дмитрий Саввин “албакаатым этиитин кытары сөпсөһөбүн” диэн хоруйдаата. Судьуйа Егорова “Уаровы уонна Саввины бу дьыл ахсынньы 2 күнүгэр дылы дьиэ хаайыытыгар олороллорун оннунан хаалларарга” диэтэ.
Аныгыскы суут истиитэ балаҕан ыйын 9,11,16,17 күннэригэр буолуоҕа. Онно борокуруор туоһу быһыытынан ССТХА ректорын Иван Слепцову, Мичил Колодезниковы, Михаил Степановы, Иннокентий Прокопьевы, Варвара Шевелеваны, Сунтаартан Туяра Прокопьеваны, Борис Герасимовы, Варвара Кириллинаны, Георгий Тараяровы ыҥыралларыгар модьуйда. Суут хаамыытын сиһилии кэтээн көрөбүт.
