Балаҕан ыйын 4 күнүгэр Ил Дархан Айсен Николаев, V Илиҥҥи экономическай форум иһинэн дойду бэрэсидьиэнэ Владимир Путин ыытар Судаарыстыбаннай Сэбиэт президиумун мунньаҕар сүрүннүүр спикер быһыытынан кыттыаҕа.
Саамай улахан эрэгийиэн салайааччыта Уһук Илиҥҥи уокуругу 2025 сылга диэри сайыннарар (инникитин 2035 сылга диэри) Национальнай бырагыраамма бырайыагын билиһиннэриэҕэ. Бэлиэтээн этэр буоллахха, Айсен Николаев РФ Судаарыстыбаннай Сэбиэтин бэлэмниир үлэлиир бөлөх салайааччыта буолар .
Национальнай бырагыраамма бырайыагар киирбит этиилэри көрүүгэ бырабыыталыстыба, парламент, муниципальнай тэриллиилэр бэрэстэбиитэллэрэ, экспертэр, учуонайдар эрэ буолбакка, уокурук олохтоохторо, уопсастыбаннай түмсүүлэр бэрэстэбиитэллэрэ кыттыыны ыллылар. Уопсайа 230 тыһ киһи бэйэтин санаатын эппит, анал саайтка 16,5 тыһ этии киирбит.
Санатар буоллахха, Уһук Илиҥҥи уокуругу 2025 сылга диэри сайыннарар (инникитин 2035 сылга диэри) Национальнай бырагыраамманы оҥорууну, Владимир Путин былырыын Владивосток куоракка буолбут IV Илиҥҥи экономическай форум түмүгүнэн сорудахтаабыт.
Балаҕан ыйын 4-6 күннэригэр Владивосток куоракка ыытыллар V Илиҥҥи экономическай форум аһаҕас эфирын “Якутия 24” ханаалга көрүөххүтүн сөп.
