Дойду арктическай зонатыгар уонна хоту сиргэ мэдэссиинэ көмөтүн хааччыйыыны федеральнай таһымҥа сокуонунан бигэргэтиэхтэрин сөп. Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрэр.
Маныаха боппуруоһу быһаарарга балаҕан ыйын 27 күнүгэр Айсен Николаев Госдума доруобуйа харыстабылын кэмитиэтин бэрэссэдээтэлэ Дмитрий Морозовы кытары көрсүһүүтүгэр дьүүллэстэ.
“Арассыыйа тыйыс усулуобуйалаах Арктика уонна хоту сирдэригэр, ол иһигэр Саха сиригэр, мэдэссиинэ көмөтүн оҥорууну тэрийии судаарыстыба өттүттэн ордук болҕомтоҕо сылдьыахтаах уонна өйөбүлү ылыахтаах ” , — диэтэ Айсен Сергеевич.
Көрсүһүү түмүгэр Дмитрий Морозов эрэгийиэн баһылыгын санаатын өйүүрүн биллэрбит. Маны таһынан, Морозов Дума кэмитиэтэ Ил Түмэни уонна бырабыыталыстыбаны кытары эрэгийиэннээҕи доруобуйа харыстабылын систиэмэтин сайдыытыгар бииргэ үлэлэһэргэ бэлэмин биллэрдэ.
