Эбээн-Бытантайга бырабыыталыстыба отчуота саҕаланна

Бүгүн, олунньу 17 күнүгэр, Эбээн-Бытантай улууһугар вице-премьер Денис Белозеров салайааччылаах оробуочай бөлөх нэһилиэнньэ иннигэр салалта үлэтин-хамнаһын отчуоттуу тиийдэ.

Дениз Белозеров бэлиэтээбитинэн, өрөспүүбүлүкэ бырабыыталыстыбата сыл ахсын улууска олоххо-дьаһахха наадалаах таһаҕаһы тиэрдиигэ тиһиктээх үлэни ыытар. Былырыыҥҥы навигация кэмигэр улууска 6,2 тыһ. туонна таһаҕас, ол иһигэр 4,6 тыһ. туонна ньиэп, 1,6 тыһ. – ньиэп бородууктата тиэрдиллибит. Инньэ гынан былаан100 бырыһыан туолбут. Улуус суолларын көрүүгэ-истигэ анаан 1,175 мөл. солк. көрүллүбүт. Быйыл ити сыалга 7,869 мөл.солк. бэриллибит. Улуус киинигэр Саккырыырга быйыл “Дороги Арктики” хааһына тэрилтэтин салаата арыллар, онно олохтоохтор үлэҕэ киириэхтэрэ.

“2019-2025 сс. гражданнары хаарбах дьиэттэн көһөрүү” аадырыстаах өрөспүүбүлүкэ бырагырааматын иитинэн улууска 1,5 тыһ. кв.м. иэннээх 6 элбэх кыбартыыралаах дьиэни көһөрүөхтэрэ. Саккырыыр олохтоохторо “Ойгидо” түөлбэҕэ киин ититиигэ кыайан холбоммокко хаалбыт 70 дьиэни (онно өссө да саҥа дьиэ дьэндэйэр) холботорго туруорсаллар. Маны таһынан, олохтоохтор “Ростелеком” интэриниэтэ олус бытаанын эттилэр. Маны сэргэ, олохтоохтор ветеринарнай лабаратыарыйаны саҥалыы тэхэньиичэскэй сэбилээһинин боппуруоһун, киин балыыһаны УЗИ аппараатынан хааччыйыыны, субсидиялаах авиабилиэт аҕыйаҕын уонна ГСМ сыаната олус үрдүгүн көтөхтүлэр.

Оробуочай бөлөх салгыы Дьарҕалаах уонна Кустуур нэһилиэгин олохтоохторугар отчуоттуоҕа. Бу туһунан бырабыыталыстыба уонна Ил Дархан дьаһалтатын пресс-сулууспата суруйар.