Бэҕэһээ, атырдьах ыйын 4 күнүгэр, Айсен Николаев Ил Дархан уонна бырабыыталыстыба дьаһалтатыгар саҥа каадырдары анаата.
Ол курдук, Ил Дархан уонна бырабыыталыстыба информационнай бэлиитикэтин уонна маассабай коммуникация департаменын салайан олорбут Афанасий Ноев дуоһунаһыттан босхолонно уонна Ил Дархан көмөлөһөөччүтүнэн ананна. Кини Айсен Николаев пресс-сэкэрэтээрин дуоһунаһын толоруоҕа. Оттон бу иннинэ пресс-сэкэрэтээрдии олорбут Ирина Ефимова “Саха” НКИК генеральнай дириэктэрин солбуйааччытынан ананна. Оттон информационнай бэлиитикэ департаменын салайааччытынан уопсастыбаннай тэриллиилэр уонна гражданнар модьуйууларын , иһитиннэриилэрин кытары үлэлэһэр Управлениены салайан олорбут Василий Амбросьев ананна.
Афанасий Иванович “Саха” НКИК бастакы салайааччыларыттан биирдэстэрэ, “Сахамедиаҕа” эмиэ салалтаҕа өр кэм устата үлэлээбит улахан уопуттаах, типографияны салайан олорбута. Кини бэчээт, интэриниэт, телевидение эйгэтин иһиттэн билэр салайааччы. Маны таһынан, Афанасий Ноев Саха сирин суруналыыстарын сойууһун бэрэссэдээтэлин солбуйааччыта. Онон кинини медиа-эйгэҕэ үчүгэйдик билэллэр. Афанасий Иванович саҥа дуоһунаһыгар хорутуулаахтык үлэлииригэр саарбахтаабаппыт уонна киниэхэ ситиһиилэри баҕарабыт.
