Ил Түмэҥҥэ 4 сис кэмитиэт: урбааҥҥа, туризмҥа уонна инфраструктураны сайыннарыы (И.Григорьев), сир сыһыаннаһыыларыгар, айылҕа ресурсатыгар уонна экологияҕа (В.Прокопьев), тыа сиригэр уонна аграрнай бэлиитикэҕэ (А. Находкин), хотугу аҕыйах ахсааннаах омуктар боппуруостарыгар уонна Арктика дьыалаларыгар (Е. Голомарева) мунньахтаан баран, өрөспүүбүлүкэ бэрэссэдээтэлин солбуйааччытынан Михаил Никифоровы оҥорорго сөбүлэҥнэрин биэрдилэр уонна парламент Ил Дархан бигэргэтэригэр көҥүллүүрүн өйүүргэ эттилэр.
Сунтаар улууһун сэттэ сыл сатабыллаахтык салайан кэлбит Михаил Викторовиһы дьокутааттар хайҕаатылар: “Бырабыыталыстыбаҕа маннык таһымнаах да киһибит ахсааннаах”, - диэн Михаил Гуляев тоһоҕолообут. Дьокутааттар Михаил Никифоровка долгутар ыйытыыларын биэрбиттэр. Онуоха Никифоров “эһигини кытары бииргэ хоннохтоохтук ылсан үлэлииргэ бэлэммин”, - диэн эппит. Бу туһунан сахапарламент саайт суруйар.
Санатар буоллахха, Михаил Викторович от ыйыттан бырабыыталыстыба бэрэссэдээтэлин солбуйааччытын эбээһинэһин толорооччунан сылдьар. Кини бырабыыталыстыбаҕа территориялары сайыннарыы боппуруостарын иилиир: тыа сирин сайыннарыы, аграрнай бэлиитикэ уонна АПК-ны сайыннарыы, хоту дойду төрүт дьарыктара, балык хаһаайыстыбата, Арктика уонна хоту сир территорияларын сайыннарыы, урбааны уонна туризмы сайыннарыы, эргиэни бэрээдэктээһин, ветеринария, общепит. Иилиир боппуруостарыгар хамыыһыйалары уонна сэбиэттэри салайар. Кини маннык министиэристибэлэр үлэлэрин сүрүннүүр: ТХМ, урбаан, туризм уонна эргиэн, Арктиканы сайыннарыы уонна хотугу норуоттар дьыалаларын министиэристибэлэрин уонна ветеринария департаменын.
Бырабыыталыстыба чилиэннэрин Ил Түмэҥҥэ бигэргэтии сэтинньи 10 күнүгэр пленарнай мунньахха буолуоҕа. Пленарнай мунньах очнай форматынан ыытыллара былааннанар.
