Кэлэр 2022 сыл - өрөспүүбүлүкэҕэ Ийэ сыла

Ил Дархан бүгүн буолбут Ил Түмэҥҥэ илдьитигэр, кэлэр 2022 сылы өрөспүүбүлүкэҕэ Ийэ сылынан биллэрдэ. Маныаха, эһиил саҥа төрөөбүт хас биирдии кырачааҥҥа 100 тыһынча солкуобай көрүллүөхтээҕин туһунан эттэ. - Ийэ сылыгар кэрэ аҥаардар, ийэлэр дьарыктаах, үлэлээх буолууларыгар болҕомто ууруллуоҕа. Дьарыктаах буолуу кииннэригэр, бастатан туран, ханна олороллоруттан, саастарыттан, социальнай балаһыанньаларыттан тутулуга суох кинилэр боппуруостара быһаарыллыаҕа. Маны таһынан, кэрэ аҥаардар чөл туруктаах буолууларыгар анал бырагыраама үлэлиэҕэ, – диэн Ил Дархан иһитиннэрдэ. Ийэ сылыгар, биэс уонна онтон элбэх оҕолоох ыалларга анаан дьиэ ылыыларыгар көмө баар буолуоҕа. Билиҥҥи туругунан, өрөспүүбүлүкэ үрдүнэн 1815 ыал дьиэ ылыытыгар уочаракка турар. Быйыл олортон 56 ыал көмөнү ылла. “Маннык тэтиминэн бардахпытына, дьиэ кэргэн отучча сыл дьиэтин кэтэһиэн наада. Онон, кэлэр биэс сыл тухары бу кыһалҕаны быһаарарга бырабыыталыстыбаҕа сорудах биэрэбин. Маны таһынан, муниципальнай тэриллиилэр биэстэн элбэх оҕолоох дьиэ кэргэҥҥэ көмөлөһөллөрүгэр, кинилэри дьиэ-уот нолуогуттан босхолуулларыгар этии киллэрэбин”, – диэн Айсен Сергеевич бэлиэтээн эттэ. СӨ Ил Дархана тулаайах уонна төрөппүт көрүүтэ-истиитэ суох хаалбыт оҕолорго, кинилэри иитэ ылар ыалларга болҕомтону ууруу туһунан иһитиннэрдэ. “Өрөспүүбүлүкэ үрдүнэн, билиҥҥи туругунан, 233 ыалга 634 оҕо иитиллэр. Көмө быһыытынан кинилэргэ үбүлээһини икки төгүл улаатыннарыахха. Дьокуускайга дьиэ кэргэҥҥэ, оҕолорго социальнай көмө киинин тутуутун эһиилгиттэн былаанныахха. Маны таһынан, дьиэ кэргэҥҥэ, ийэҕэ анаммыт бырайыактаах уопсастыбаннай түмсүүлэргэ бэриллэр гырааны икки төгүл элбэтиэххэ”, – диэн эттэ. Түмүккэ, Ил Дархан 2022 үбүлүөйдээх сылга төрөөбүт оҕолорго “Дети столетия” диэн соруктаах, 100 тыһыынча солкуобайдаах хапытаалы аныырга этии киллэрдэ .

Тарҕат: