Казахстаҥҥа Алматыга куоракка дьаһалта дьиэтин - акиматы, бастаанньыттар уоттаан күл-көмөр оҥордулар. Байыаннайдар чугуйдулар.
Байыаннайдар уонна силовиктар Алматы куораты хааллардылар. Куорат бастанньыттар илиилэригэр хаалла. Өрө турааччылар куорат аэропордун баһылаатылар.
Мангистаускай уобаласка, "байыаннайдар норуот диэки буоллулар, бэл тобуктаан олорон бырастыы көрдөһөллөр", диэн сурахтар куйаар ситимигэр тахсаллар. Дойду үрдүнэн былаас сүрүннээн, бэрэсидьиэни уонна судаарыстыбыннай былааһы утарар сэбилэниилээх күүстэр илиилэригэр толору киирдэ.
Казахстан бэрэсидьиэнэ Токаев тиэрдэринэн, дойдуга былааһы билигин террористар ылан эрэллэр. Кинилэр сыаллара дойдуну ыһыы уонна сэрии. Кини ОДКБ (организация коллективной безопасности) норуоттар икки ардыларынааҕы куттала суох буолуу тэрээһиниттэн көмө көрдөстө. Дойду бэрэсидьиэнэ этэринэн эрэгийиэҥҥэ билигин буола турар быһыы-майгы тас дойду агеннарын кытары сибээстээх, эрдэттэн төлөнүллүбүт террористическай аахсыйа.
Бүгүн силовиктар хат мустан Алматы куоракка сэриинэн киирдилэр. Дьиҥнээх кыргыһыы куораты ылыы иһин буолла. Байыаннайдар аэропорду төттөрү ыллылар. Өлүү-сүтүк икки өртүттэн үгүс. Аармыйа саллааттара билигин мародердары, бэрээдэги кэһээччилэри кытары бодьуустаспат буоллулар, аны кытаанахтык тутан-хабан, дьаһайан иһэллэр.
ОДКБ-га Токаев көрдөһүүтүгэр суһаллык хардардылар. ОДКБ аан дойдуга куттала суох буолуу Сүбэтинэн билигин Армения премьер-миниистирэ Никол Пашанян салайар. Кини тиэрдэринэн сотору кэминэн Казахстаҥҥа миротворецтар барыахтара, ол иһигэр Россия аармыйатын саллааттара.
