Киир

Киир

Бүгүн, тохсунньу 24 күнүгэр, куорат дьаһалтатын уопсай мунньаҕын кэмигэр, Дьокуускай куорат баһылыга Евгений Григорьев Забайкальскай кыраай Домна бөһүөлэгин олохтоохторугар ыттар саба түһүүлэриттэн оҕо өлбүтүнэн дириҥ кутурҕанын тиэртэ.

«Эмиэ маннык ыар түбэлтэ буолбута дьон ыттааҕар быдан көмүскэллээх буолуохтааҕын өссө биирдэ туоһулуур. Арассыыйа Федерациятын Судаарыстыбаннай Дууматын дьокутааттара үгүс куораттан маннык элбэх быһылааннары болҕомтоҕо ылан, федеральнай сокуоҥҥа сөптөөх уларытыылары киллэриэхтэрэ диэн эрэнэбин», - диэн куорат баһылыга санаатын эттэ.

Евгений Григорьев этэринэн, Дьокуускай куораттан «Кыыллары кытта эппиэтинэстээх сыһыан туһунан» 498 Федеральнай сокуоҥҥа уларытыылары киллэрэр туһунан этии Судаарыстыбаннай Дуумаҕа Саха сирин аатыттан барбыт.

Дьокуускай куорат баһылыга бэлиэтииринэн, судаарыстыбаннай бүддьүөттэн үбүлэнэн, ыттары үйэлэрин тухары тутуу биир сүрүн боппуруоһунан буолар. Маны таһынан, бэйдиэ сылдьар ыттары учуоттуур биир кэлим ньыма оҥоһуллуохтааҕын уонна бигэргэтиллиэхтээҕин учуоттаан, субвенция сууммата сөпкө көрүллүөхтээҕин туһунан эттэ.

Санатар буоллахха, Дьокуускайга өрөспүүбүлүкэ бүддьүөтүттэн 2022 сылга 31 мөл. субвенция дьэллик харамайдар ахсааннарын сүрүннүүргэ анаан көрүллүбүтэ. Куорат дьаһалтата бу суумманы олус кыранан ааҕар уонна хас да төгүл улаатыахтааҕын туһунан тоһоҕолуур.

Тарҕат:

Санааҕын суруй