Дьобуруопа сойууһа Арассыыйа утары саҥа санкциялаах бакыатын таҥан бүтэрдэ. Рестрикцияҕа Судаарыстыбаннай дуума дьокутааттара, «үрдүк дуоһунастаах чунуобунньуктар», бааннар уонна урбаанньыттар түбэстилэр.
Дьобуруопа сойууһун саайтыгар киирбит дөкүмүөҥҥэ сурулларынан, ДН уонна ЛН өрөспүүбүлүкэлэри тутулуга суох билинэргэ куоластаабыт Судаарыстыбаннай дуума 351 дьокутаатын, маны таһынан, «Украина территорията сыалай буолуутун кэһиигэ дьоһун оруолу ылбыт» 27 үрдүк дуоһунастаах физическэй сирэйдэри уонна тэрилтэлэри хааччахтыыр буоллулар. Кинилэр быыстарыгар бырабыыталыстыба чилиэннэрэ, баан тэрилтэлэрэ, урбаанньыттар, байыаннай салайааччылар уонна «дезинформацияны тарҕаппыт» сирэйдэр кииристилэр.
Хааччахтарга түбэспиттэр Дьобуруопа Сойууһун сиригэр-уотугар үктэнэллэрэ бобуллуохтаах, маны таһынан, үптэригэр-харчыларыгар көҥүл тиийэр кыахтарын «тоҥоруллуохтаах» эбит.
Дьобуруопа сойууһа тохтуу түһэн баран, хааччахха түбэспиттэр испииһэктэрин официальнай таһаарыыларга сырдатыахтаах.
Маны таһынан, Дьобуруопа сойууһа Донецкай уонна Луганскай норуодунай өрөспүүбүлүкэлэри кытта экономическэй сибээһи олохтууру бопто. Даҕатан эттэххэ, Брюссель этиитинэн, итинник быһаарыныы өрөспүүбүлүкэлэр «агрессиялаах дьайыыларын экономическэй охсуутун билэллэригэр» сабыдыаллыахтаах.
Рестрикция Донецкай уонна Луганскай норуодунай өрөспүүбүлүкэлэр табаардарын импорт уонна экспорт өттүгэр, эргинэр дьайыыларыгар уонна инвестиционнай үлэлэригэр сыһыаннаах буолуоҕа.
Итини таһынан, үп-харчы санкциятын чэрчитинэн, Арассыыйа уонна Центробанк европейскэй хапытаалларга, үп-харчы ырыынагар уонна сервистэригэр киирэллэрин Дьобуруопа сойууһа бопто.
Дьобуруопа дипломатиятын салайааччыта Шарль Мишель этэринэн, бу чэппиэргэ Украинаҕа буола турар быһыы-майгы тула Дьобуруопа сойууһун суһал саммита буолуохтаах. Кини дойдуларга ыҥырыы суругар Дьобуруопа буола турар быһыыга-майгыга «сомоҕолоһуутун харыстыахтаах уонна хайдах кэллэктиибинэй эппиэти биэрэрин быһаарыахтаах».
www.rbc.ru саайтан ылылынна
хаартыска duma.gov.ru саайтан туһанылынна
