Бастакы күн түмүгүнэн, РФ Оборуонатын министиэристибэтэ Украина соҕуруу өттүгэр Херсон куоракка тахсар суол аһыллыбытын, Днепртан Крымҥа барар уу бүөлэнэн турбут ханаалын ылан, Крымҥа ууну ыыппыттарын, барыта авиациянан, ракеталарынан Украина 83 байыаннай инфраструктурата (сэрии сэбин ыскылааттара, баазалара) үлтүрүтүллүбүтүн, Украина икки СУ-27, икки СУ-24 сөмөлүөттэрэ, биир бөртөлүөтэ, түөрт “Байрактара” суулларыллыбытын иһитиннэрдэ. Төһө киһи бастакы күн өлбүтэ биллибэт. Элбэх эбитэ буоллар биллиэ этэ. Армения икки Азербайджан сэриитигэр ол туһунан видео элбэҕэ.
Арассыыйа аармыйата хотуттан, илинтэн, соҕурууттан хас да фронунан киирэр. Улахан куораттары төгүрүйэн иһэр. Бөртөлүөттэринэн десант быраҕа-быраҕа суол ыраастатан, тиэхиньикэ түргэнник баран иһэр эбит. Бэҕэһээ Киев анныгар баар улахан сөмөлүөттэр түһэр Гостомель аэропорду ылбыт этилэр. Украина пропагандата десант үлтүрүтүлүннэ диир да, Зеленскэй киэһэ “нууччалар Киев анныгар бааллар, өссө Киевтэн 41 км ыраах Чернобыль АЭС ылбыттар, Киевкэ диверсионнай бөлөхтөр киирбиттэр, НАТО, Евросойуус бары миигин бырахтылар” дииринэн сылыктаатахха, аэропорду чахчы ылбыттар. Ол аата Арассыыйаттан десаннаах улахан сөмөлүөттэр кэлэн түһэн, бүгүн Киевкэ киирэллэрэ буолуо. Арассыыйа аармыйата куораттары ытыалаабакка, төгүрүйэн олорон бэриннэрэрэ буолуо дииллэр. Куоракка киирдэхтэринэ, элбэх сиэртибэ тахсар. Эмиэрикэ Киев аҕыйах хонугынан сууллуо диэн эттэ.
***
Соҕуруу өттүгэр Херсон Арассыыйа сэриилэрин хонтуруолугар киирбит. Крымтан киирбит чаастар Мелитополь куораты эргийэн баран Донецкай фронун утары барбыттар. ДНР сэриилэр Украина оборуонатын алдьатан, 10-тахсан км барбыттар. Бүгүн ити икки бөлөхтөр утарыта көрсөн, Мариуполь куораты уонна ити оройуоҥҥа баар Украина сэриилэрин төгүрүйэллэрэ буолуо. ЛНР өттүгэр Украина сэриилэрин сыҕарытыы кыра, ол эрээри, хоту диэкиттэн киирэн иһэр Арассыыйа чаастарын сыҕарыйыылара түргэн, сотору холбоһоллор.
Бүгүн биһиэннэрэ муора кытыытыгар Одессаҕа, Николаевка тахсыахтаахтар. Оччоҕо муораттан көмө кэлбэт. Арҕаа Украина кыраныыссатыгар тахсан, Европаттан сэрии сэбэ, наемниктар киирэллэрин быспыттар дииллэр. Чуолкайданыан наада. Арассыыйа чаастара ылбыт куораттарын нацистартан ыраастыахтаахтар.
***
Информация фронугар наһаа элбэх сымыйа баар дииллэр. Киев эрэсиимэ дьон бартыһааннаан, Арассыыйа сэриилэрин тохтотуо диэн кэтэһэр эбит да, ким өлө оонньуоҕай?
Пропаганда куораттарга Арассыыйа байыаннай тиэхиньикэтин түннүгүнэн “Молотов коктейлын” быраҕан уматыҥ диир эбит. Ону эспиэрдэр дьиктиргииллэр. Украина 250 тыһ. киһилээх сэриилээх, өссө бэлииссийэни, атын байыаннай аҥаардаах күүстэри түмэн, 500 тыһ. киһилээх. Ол эрээри, оҕону-дьахтары умайар бытыылканы түннүгүнэн быраҕан сэриилэһэргэ ыҥырар буоллаҕына, байыаннайдара чахчы үксэ ыһыллан бүппүттэр быһыылаах.
***
Эмиэрикэ, НАТО Арассыыйаны утары сэриилэри киллэрбэппит диэтилэр. Арассыыйа дьонун, туристарын Европаҕа киллэрбэт оҥоруохха дииллэр да, харчы киллэрэр туризмнарын быспаттара чахчы.
Путин бэҕэһээ Москубаҕа бөдөҥ биисинэс бэрэстэбиитэллэрин, олигархтары кытта көрсүбүт. Кинилэргэ харчыларын, кыраныысса таһыгар баар оҕолорун аймахтарын Арассыыйаҕа киллэрэн үлэлээҥ диэбит. Санкциялар охсууларын сымнатыыга көмөлөһүөх буолбут.
***
Оборона миниистирэ Шойгу Украина байыаннайдарын сэриилэрин сэбин ылан баран дьиэлэригэр ыытыҥ диир. Онон, улахан хаан тохтуута бастакы хонукка тахсыбатах.
***
Төһө да Арассыыйа улахан бааннарыгар санкция биллэрдэллэр, арҕаа дойдулар Арассыыйаны SWIFT систиэмэтиттэн араарбаппыт дииллэр. Бу бааннар бары Visa, Mastercard хаарталар туох да хааччаҕа суох дойду иһигэр үлэлииллэрин, валюта атыыланар, төһөнү баҕарар баантан устуоххун сөп диэн иһитиннэрдилэр. Арай кыраныысса таһыгар тахсарга, санкцияҕа түбэспэтэх баан хаартатын илдьэ сылдьар ордук.
Харчы эстэр, ыарыыр, ас-үөл тиийбэт буолар диэн наһаа пааньыкалыыр эрдэ. Баҕалаахтар харчы уурунуохтарын, ас хаһааныахтарын сөп. Ким да утарбат, хас биирдии ыал, киһи бэйэтэ быһаарынар дьыалата.
Арба, биһиэхэ сымыйаны кимнээх эрэ анаан тарҕаталлар. СӨ байыаннай комиссариата Украинаҕа ыытарга анал этэрээттэри хомуйбаппыт диэн бэҕэһээ тахсыбыт биллэрии сымыйатын эттэ.
***
Оттон бу кэмҥэ Эмиэрикэ Foxnews телеханаал биллэрбитинэн, Кытай 8 истребителэ уонна разведчик сөмөлүөтэ Тайвань салгыннааҕы кыраныыссатын кэспиттэрин иһитиннэрбит. Тайвань Кытай Арассыыйаны үтүктэн биһиэхэ киириэ диэн дьиксинэр үһү. Арассыыйа Тайваны Кытай сирэ диэн билинэр.
Салгыы иһитиннэрии оҥоруохпут.
Владимир Степанов.
