Арассыыйа оборонатын министиэристибэтэ олунньу 25 күнүн киэһэтигэр иһитиннэрдэ:
Украина байыаннай күүстэрин (УБК) 211 байыаннай инфраструктураларын эбийиэктэрэ: ол иһигэр 17 сэриилэри салайар уонна сибээс пууннара, 19 салгынтан көмүскүүр С-300 уонна “Оса” ракетнай комплекстар, радиолокационнай станциялар үлтүрүтүллүбүттэр, 6 бойобуой сүмүлүөт, 1 бөртөлүөт, 5 пилота суох көтөр тэриллэр суулларыллыбыттар. 67 тааҥка, бронетранспортер, 16 реактивнай уот систиэмэтэ, 87 анал байыаннай тиэхиньикэ үлтүрүтүллүбүт.
***
Эмиэрикэ биэрбит аатырдар “джавелиннара”, Турция “байрактардара” бастакы күн ыскылааттарга дэлби тэптэриллибиттэр. Онон биһиги тиэхиньикэбитин хампарыта ыталлара туга да суох хаалбыттар.
Харьковы биһиэннэрэ иккис күнүн күүстээх утарсыыны көрүстүлэр, ыраастыы сылдьаллар. Сумскай уобаластан, Сумы куораттан сэриилэр дьиэлэригэр тарҕаһан, сэриилэспэтэхтэр.
Соҕуруу фроҥҥа Арассыыйа сэриилэрэ Николаевка чугаһаабыттар. Бүгүн эргийэн баран Одесса диэки бараллар. Ытыалааһын бу икки куораттарга иһиллэр дииллэр. Одессаҕа өссө муораттан десант түһэриэхтэрин сөп. Одессаттан Киевкэ диэри - аһаҕас суол. Запорожьеҕа бүгүн тиийэллэрэ буолуо.
Мариуполы, Донецкайтан кэлбит ДНР чаастара атаакалыы сылдьаллар. Кинилэргэ холбоһо Крымтан иһэр чаастар тиийиэхтээхтэр. Мариупольга били Донбаска хаан бөҕөтүн тохпутунан аатырбыт националистическай “Азов” батальон ордуулана сытар. Бу дьон “Азовсталь” собуот сиригэр, тааҥкаҕа тиийэ сэрии сэбин мунньан, бөҕөргөтүнэ сыталлар үһү. “Азовтар” хара айыылара элбэҕинэн, билиэн бэриммэттэрэ чахчы. Биһиэннэрэ күүстээх уотунан сири кытта сир оҥороллоро буолуо. Мариуполь ылылыннаҕына, Арассыыйаттан Крымҥа диэри сиринэн сылдьар “көрүдүөр” аһыллыахтаах.
Луганскай өттүгэр УБК утарсыыта улахан буолан, ополчение сыҕарыйыыта бытаан, ол оннугар хотуттан киирэр Арассыыйа чаастара түргэттэр үһү. Утарыта көрсөн, УБК сэриилэрин төгүрүйүөхтэригэр диэри 3 көс хаалбыт. Бүгүн төгүрүктүүллэрэ чахчы.
***
Зеленскэй Путинныын кэпсэтэ сатыыр, ол эрээри, биһиэннэрэ толору капитуляция кэннэ диэн аккаастыыллар. Путин Украина байыаннайдарын “былааһы бэйэҕит ылыҥ” диэн ыҥырар.
Онтон Зеленскэйи дьоно ханна эрэ бункерга илдьибиттэр. Кини “бу мин, баҕар, тиһэх видеом буолуо” диирин бэйэтин смартфонунан устан ыыппыт. Ол аата, команднай пууна, былааҕа да суох хаалбыт быһыылаах. Оннооҕор Чечняҕа боевиктар хамандыырдара видеоларын былаахтарын фонугар усталлара. Атын сабаҕанан, Зеленскэйи арҕаа дойдулар куоттаран илдьибиттэр дииллэр.
***
Арассыыйа байыаннайдара Киевы төгүрүйбүттэр. Иллэрээ күн Киевтэн 25 км ыраах Гостомель диэн аэропорду ылбыт 200 биһиги анал сэриилэрбит бөлөхтөрүн УБК саллааттара түүнү быһа сэриилээн, хаста даҕаны кыайдыбыт диэбиттэрэ сымыйа буолла. Арассыыйа эбии күүстэрэ кэлэн уолаттары быыһаабыттар. УБК-лары ыраах чугутан, Арассыыйаттан улахан транспортнай сөмөлүөттэр кэлэн түһэллэр. Сөмөлүөттэр түһэллэрэ Украина салгынтан көмүскэнэр күүстэрэ чахчы үлтүрүтүллүбүттэр диэн этэр. Бу түүн Киевы штурмалааһын буолуо дииллэр. Ытыалаһыы иһиллэр видеолара тарҕаналлар да, улахан штурм бара илик быһыылаах.
Баһар, пропаганда, куттааһын да буолуо, Киевы Рамзан Кадыров 10 тыһ. киһилээх сэриилэрэ ылыахтара дииллэр.
Украина байыаннайдара Киевы көмүскээҥ диэн боростуой дьоҥҥо 18 тыһ. аптамааты, бэл, пааспара суох дьоҥҥо биэрбиттэр. 2-лии маҕаһыыннаах. Уочаратынан ыттахха, ити ботуруон аҕыйах мүнүүтэнэн бүтэр. Хонтуруола суох аптамаат биэрэн, халааччылар, мародердар бөҕө элбиэхтэрэ диэн дьиксинэллэр. Сэрии бүппүтүн да кэннэ, ити аптамааттары барытын хомуйан ылар уустук буолуо.
***
Билигин Зеленскэйи суулларыы кэннэ ким быстах кэм салайааччыта буолуой диэн кэпсэтии баран эрэр. Николай Азаровы, Олег Царевы ааттыыллар. Зеленскэй – комик-артыыс, норуот бырачыастаан, биһиэхэ “барыларын утарабын” дииллэринии, былааһы күлүү гыныы курдук талыллыбыт киһи. Украина илин, арҕаа, киин сирдэрэ тус-туспа өйдөөх-санаалаах, менталитеттаах дьон. Урут ити үс аҥыы арахса сылдьар өйдөөх дьону түмэр, бары сөбүлүүр бэрэсидьиэннэрэ суоҕа. Ющенко майдааннаан бэрэсидьиэн буолбутун кэннэ, арҕаа Украинаттан Бандера идеологията судаарыстыбаннай буола сылдьар.
Бигэ судаарыстыба оҥорорго, дьону түмэргэ Германиялыы тииптээх федерализация ордук буолуон сөп этэ дииллэр.
***
Арассыыйаны утары санкция бөҕө ылыллан эрэр, биһигини кэһэтэллэр диэн пааньыкалыыр арыый эрдэ. Оннук үлүгэр буолуо суоҕа. Тоҕо диэтэххэ, арҕаа дойдулар экэниэмикэлэрэ Арассыыйаттан тутулуга кырата суох. Холобур. АХШ атомнай станциялара оттук буолар ураннарын 80% биһигиттэн ылаллар, үрдүк технологияҕа, космоска туттуллар титаны эмиэ биһиги атыылыыбыт. Япония эмиэ санкция биллэрдэ да, син-биир Сахалинтан углеводородтары ыларбытын быспаппыт диэн тоһоҕолоон эттэ.
...Сонньуйан эттэххэ, 2014 с. санкция кэннэ, биһигини “Белоруссия семгата, креветката” абыраабытын курдук, атын дойдуларынан эргитэн ылан, олох быстыбаппыт буолуо.
Украинаҕа ыытыллар демилитаризация, денацификация хайдах барарын салгыы иһитиннэриэхпит.
Владимир Степанов.
Хаартыска аһаҕас источниктан ылылынна
