Олунньу 26 күнүн түмүгүн билиһиннэриим. В. Зеленскэй иллэрээ күн тупсуу туһунан кэпсэтиэххэ диэн ыҥырбытын иһин, Путин тохтотон, Арассыыйа байыаннай күүстэрэ (АБК) 12 чаас устата күүппүттэр. Ол эрээри, Зеленскэй албыннаабыт, бэҕэһээ сарсыарда аккаастаабыт.
***
Чаастар салгыы барар бирикээс ылан, балаһыанньа түргэнник уларыйан иһэр. Николаев куораты төгүрүйбүттэр. Николаев мээрэ тааҥкалар куорат ортотунан итии быһах арыыны быһарыныы аастылар диэбит.
Николаевтан Одесса диэки барбыттар. Одессаҕа Украина куттал буолуутун сулууспата (УКБС) докумуоннарын уматан баран эмиэ куоппут. Ситэ умайбатах кистэлэҥ докумуоннарын суруналыыстар ылан, соцситимнэринэн тарҕата сылдьаллар.
***
Арассыыйа улахан куораттары Украина сэбилэниилээх күүстэриттэн (УСК) ыраастаабакка, туох да киирбэт-тахсыбат гына төгүрүйэ-төгүрүйэ тумнан баран иһэр тактиканы тутуһар. Куораттарга элбэх алдьатыы, эйэлээх дьон өлүүтэ тахсар диэн тыыппат бирикээстээхтэр. Онон туһанан, УБК тыытыллыбакка хаалбыт бөлөхтөрө кэннилэриттэн тахсан, хаалбыт биирдиилээн тиэхиньикэлэри бултаһаллар.
Хоту Чернигов төгүрүтүллэн турар, мээрдэрэ булт саалаах да тахсыҥ диэн ыҥырар. Ким тааҥкалары утары доруоптаах тахсыай? Черниговтан, Сумскай уобаластан АБК биир бөлөҕө Киев диэки баран иһэр. Бүгүн Киевкэ тиийэллэр дииллэр.
Бу күннэргэ элбэх сэрии муһуннаҕына, Киевы дьиҥнээхтик ылыы саҕаланара буолуо. Ол кэннэ, Украина саҥа былааһа олохтонор кэпсэтиитэ барара чуолкай.
***
Киевы Арассыыйа чаастара штурмалыы иликтэр, ытыалаһыы куорат кытыытыгар барар. Арба, Украина спецназтара Гостомель аэропордугар иллэрээ күн чеченнэри сэриилии сатаан баран, кыайбатахтар эбит.
Ол да буоллар, Киев иһигэр ытыалаһыы бөҕө, хаос, анархия дииллэр. Зеленскэйдээх барыта Киевкэ 25 тыһ. аптамааты, 1 мөл. ботуруону, гранаталары таах биэртэлээбиттэр. Сэрии сэптэнэн Киев иһигэр халааһын, мародердааһын элбээбит. Аптамааттаах дьон уулуссаҕа, бэйэ-бэйэлэрин диверсаннар диэн куттааһынтан ытыалаһаллар, номнуо 100-кэ киһи өлбүт дииллэр.
УБК бронетранспортердара Киев ортотугар туран, түүн түбэһиэх халлааны ытыалыыллар. Диверсаннар киирбиттэр диэн пааньыка тэрийэ сатыыллар үһү. Оннук видеолар тарҕаналлар.
***
Илин Украинаҕа биһиэннэрин иннигэр Донбасска баар УСК элбэх байыаннай тиэхиньикэлээх, 125 тыһ. киһилээх улахан күүстэрин төгүрүйэн үлтүрүтэр, Киев диэки куоттарбат сүрүн сорук турар.
Мелитополь ылыллыбыт. Крымтан тахсыбыт иккис бөлөх Мариупольга кэлэн, ДНР сэриилэрин кытта холбоһон, Бердянскай аэропордун ылбыттар. УБК күүстэрин Мариупольга муораҕа ыга хаайбыттар. Куорат салалтата, УКБС уонна байыаннайдар хамандыырдара эрдэ куоппуттар, куоракка эмиэ хаос буолбут. “Азов” саллааттара террордууллар. Куораттан олохтоохтору куттаан таһаарбаттар, бэйэлэрин дьоннорун ытыалыыллар. Нэһилиэнньэнэн хаххаланаары гыналлара саарбаҕа суох.
***
Хоту Харьковтан иһэр улахан бөлөх ЛНР чаастарын кытта көрүстэҕинэ, Украина илиҥҥи саамай улахан бөлөҕүн толору төгүрүктээһин бүтэр. Ити диэки ТОС-1 ыарахан огнемет тэриллэрэ баалларынан, УБК сэриилэрин бэриммэтэхтэринэ, огнеметтарынан уматыахтарын сөбө буолуо. Ити улахан кутталлаах сэрии сэбэ, биир күргүөм ытыынан 4 гектар сири уматар.
Биһиги сэриилэрбит Харьков анныгар УБК улахан колоннатын ракеталарынан үлтүрүппүттэр. АБК куоракка штурмалыы киирэ иликтэр. Бу күннэргэ саҕаланара буолуо.
УСК чаастара Харьков анныгар Салтовка диэн дэриэбинэҕэ бөҕөргөтүнэ сыппыттарын, “Градынан” суох гыммыттар. Олохтоохтор аныгы сэрии сэбэ ынырыгыттан улаханнык дьулайбыттар. Итинник киинэҕэ да көстүбэт.
***
Зеленскэй кэпсэтиэххэ диэн албыннаабыт кэмин информационнай провокация сэриитин күүскэ саҕалыырга, психологическай террор ыытарга туһаммыттар. Украина үрдүнэн араас сымыйа-кырдьык икки ардынан сурах-садьык бөҕө тарҕанар. Киевкэ “Калибр” ракета элбэх этээстээх дьиэ муннугар дэлби тэптэ диэн айдаан буолта. Ону Украина блогердара куорат таһыттан УБК биир установката кыра ракетаны ыппыт видеотынан, ытыллыбыт кэмин, траекториятын үөрэтэн көрбүттэрэ, ол ракета баран Киевкэ түспүт эбит. “Калибр” ракета эбитэ буоллар, ол дьиэ барыта урусхалланыахтаах этэ дииллэр. Онтон ким ракетата буоларын, үлтүркэйин булан, дакаастыыр туһунан ким да кыһаммат.
Иллэрээ күн Киев кытыытыгар аптамааттах олохтоохтор нуучча диверсаннара диэн тутан өлөртөөбүт дьонноро Украина саллааттара эбиттэрин, байыаннай салалталара саҥа билиммит. Итинник видеолар манна эмиэ тарҕаналлар.
***
Сумы куораты “Градынан” ытыалаабыттар диэбиттэр да, 120 мм миномет хвостовига баарынан, эспиэрдэр, украиналар провокатордара соруйан дьону нууччалары утары туруораары, уоран ытыалаабыттар диэн сабаҕалыылар. Итинник ньыманы националистар Донбаска элбэхтэ тутталлар эбит. Сумы куоракка эмиэ байыаннай сэрии сэптээх ыскылааттары арыйан кэбиспиттэр. Ким да харабыллаабат, актыыбынайдык криминал ыла сылдьар үһү. Манна эмиэ хаос буолар буолбут.
***
Арҕаа дойдулар сэрии сэбэ, харчы биэриэхпит дииллэр эбит да, хайдах биэрэллэрэ биллибэт. Арҕаа Украинаҕа баҕар сэрии сэбин аҕалыахтара, онтон салгыы ханна да барбат. Баҕар, онуоха диэри АБК кыраныыссаҕа тиийиэхтэрин сөп. Оччоҕо ханан да сырыы суох буолар.
... Байден урукку ньиэмэс сэриитин санаан буолуо, Арассыыйа сир тоҥор сэриинэн түһүө диэбитэ туолбатаҕа. Онтон биһиэннэрэ төттөрүтүн сир ирбитин кэннэ киирэн, суоллары барытын былдьаан ылбыттар. Онон Украина тиэхиньикэтэ кытыы, бадараан суолларга хаалан, сыҕарыйыылара бытаан үһү...
Украина пропагандата дойду барыта утары таҕыста диир да, Аҕа дойду сэриитин кэмигэр курдук мөлүйүөнүнэн дьон окуопа хаһа, бөҕөргөтүү тута, ополчениеҕа киирэн уулуссаҕа тахсыбыттара суох. Ким да сэриилэһиэн баҕарбатын куораттарын уулуссалара барыта кураанахтарын көрдөрөр видеолар итэҕэтэллэр диэххэ сөп.
Владимир Степанов.
