Киир

Киир

Аан дойду 200-чэ дойдутуттан Эмиэрикэ, Дьобуруопа Арассыыйаны утары сааҥсыйаларын 48 дойду өйүүр. Эмиэрикэ ити испииһэккэ Кытайы киллэрэ сатыыр, “түргэнник быһаарымматаххына, бэйэҥ кэмсиниэҥ” диэн саанар.

***

Эмиэрикэ Кытай Тайбаан арыыны холбоноору гынарын утарар, бэл, сэриилэһиэм диэн куттуур. Маныаха диэри Кытай: “Эмиэрикэ төһө да утарыластын, Тайбаан арыыны син биир ылыахпыт. Тайбаан Украинаттан атына диэн – бу Кытай ис дьыалата, оттон Украина – дойдулар мөккүөрдэрэ”, – диэн санааны тутуһар.

Украина иирсээнигэр ХНТ-га Кытай бэрэстэбиитэлэ Чжан Цзюнь арҕаа дойдулар Киевкэ сэрии сэбин уонна наймыламмыт сэрииһиттэри ыытыы иирсээни өссө дириҥэтиэ диэбитэ. Кини Эмиэрикэни, НАТО, Евросойуус дойдуларын аан бастаан тоҕо Арассыыйа куттал суох буолуутугар дьиксиннэ диэн болҕойон үөрэтэллэригэр ыҥырбыта. Биир өттүттэн аҥаардастыы сааҥсыйалары киллэрии иирсээни тохтоппот, онон, дипломаттыы ханаалларынан кэпсэтиини күүһүрдүү көдьүүһү биэриэ диэн эппитэ.

Онтон АХШ модьуйуутун кэннэ Кытай куттанан сааҥсыйаларга холбоһуо дуо? Өйдүүргүт дуу, Эмиэрикэ Кытайы коронавирус вируһун оҥорон тарҕатта диэн буруйдуурун? Оттон бүгүн Кытай Эмиэрикэни “бактериологическай сэрии сэбин оҥороҕун” диэн, сирэй-харах анньар кыахтанна.  

Кулун тутар 6 күнүгэр РФ оборуонатын бэрэстэбиитэлэ И.Конашенков Украинаҕа АХШ байыаннай биологическай бырагырааманан кистэлэҥ бактериологическай сэрии сэбинэн дьарыктанар 30-ча лабаратыарыйаны үбүлээн олорбута биллибитин кэпсээтэ. Кини Украина Доруобуйатын харыстабылын министиэристибэтэ олунньу 24-гэр ити лабаратыарыйаларга баар чума, сибиир язвата, туляремия, холера уо.д.а. өлөр кутталлаах бактериологическай сэрии сэбин суһаллык суох гынар дьаһал биэрбит.

Львов лабаратыарыйата чуманан, сибиир язватынан, бүрүсүлүөһүнэн, Харьковка, Полтаваҕа дифтерия, сальмонеллез уонна дизентерия көбүтээччилэринэн дьарыктаммыттар. Буруйдарын кистээри, олунньу 24 күнүгэр суһаллык Львовка 232 – лептоспироз, 30 – туляремия, 10 – бүрүсүлүөс, 5 чума ыарыылары көбүтээччилээх иһит уматыллыбыт. Өссө туох кистэммитэ биллибэт. Саамай дьиксиниилээҕэ, коронавируһунан эмиэ дьарыктаммыттара биллибит. Ковиды утары эми оҥорорго наада диэн саптан, 4 тыһ. славян хаанын хомуйан АХШ-ка ыыппыттара докумуоннарга баар эбит.

Кытай ити иһитиннэрии кэннэ, АХШ-тан “Украинаҕа байыаннай лабаратыарыйаларга тугунан дьарыктаммыккытын, ол иһигэр ханнык вирустары туох сыаллаах чинчийбиккитин суһаллык арыйан бэчээккэ таһаарыҥ” диэн модьуйда. Кытай АХШ Украинаҕа көстүбүт кистэлэҥ байыаннай биологическай бырагыраамалара “айсберг ууттан быгар төбөтө” эрэ буолар диэн этэр.

... 2003 с. Колин Пауэл бокуонньук Ирак бактериологическай сэрии сэбин оҥорор диэн биир пробирканы көрдөрөн, С.Хуссейны сэриилиир сылтах булбута.

Украина урукку премьер-миниистирэ Николай Азаров Эмиэрикэ Одессаҕа баар бактериологическай лабаратыарыйатын көрө киирээри гыммытын оччолорго Украина иккис салайааччытын, ким да буол, бобуулаах диэн чугаһаппатахтарын сөҕөн кэпсээбиттээх. Ол үрдүк таас олбуор төгүрүтүүлээх, АХШ морпехтара харабыллыыр уораҕайдарын кистэлэҥэ дьиҥнээхтик арыллан биллиэн наада. Бүгүн АХШ киксэрэн, коронавирус тарҕаныытыгар аан дойду Кытайы буруйдуур. Кытай буруйа суоҕун дакаастаһыахтаах буоллаҕа.

Тарҕат:

Санааҕын суруй