2022 сылга Саха сиригэр национальнай бырайыак чэрчитинэн, 34 эбийиэги тутуу уонна саҥардыы бара турар. Федеральнай бүддьүөттэн өрөспүүбүлүкэ национальнай бырайыактарыгар 33 млрд үөһэ солкуобай көрүллүөҕэ. Бу ааспыт сыллааҕар миллиард аҥаарынан элбэх сууммалааҕын туһунан бырабыыталыстыба чилиэннэрин уонна биэдэмистибэлэри кытта мунньаҕар эрэгийиэн Бырабыыталыстыбатын Бэрэссэдээтэлэ Андрей Тарасенко этэр.
Саха сирин Ил Дархана Айсен Николаев бары национальнай бырайыактары олоххо киллэрии толорулларын уонна сааҥсыйа усулуобуйатыгар өрөспүүбүлүкэҕэ экономика үрдээһинэ харыстанарын туһугар үлэ барыахтааҕын соруйда.
«Арассыыйа бэрэсидьиэнэ Владимир Владимирович Путин биһиэхэ барыбытыгар сүрүн соругу туруорда – туох да буолбутун иһин, 2030 сылга диэри национальнай сайдыы сыалын-соругун ситиһии. Бу – дьон доруобуйатын уонна соргутун харыстааһын, олох олорууга тупсаҕай уонна куттала суох эйгэ баар буолуута, сөптөөх уонна көдьүүстээх үлэ, ситиһиилээх урбаан, сыыппара трансформацията», - диэн Айсен Сергеевич этэр.
Саха сирин премьерын мунньаҕар национальнай бырайыактары олоххо киллэрии хаамыытын уонна сааҥсыйалартан сылтаан туох куттала үөскүөн сөбүн туһунан ырытыстылар. Манна тутуу матырыйаалларын сыаналара ыарыылларын, тас дойдуттан аҕала сылдьыбыт тэрилтэлэри уларытыы уо.д.а. туһунан боппуруостары көрдүлэр.
«Доруобуйа харыстабыла» нац. бырайыагынан тэриллэри уонна тырааныспардары атыылаһыы, «Демография» уонна «Үөрэҕирии» нац. бырайыактар чэрчилэринэн, социальнай эбийиэктэри тутуу сүрүн хонтуруолга хаалла.
Өрөспүүбүлүкэҕэ судаарыстыбаннай уонна муниципальнай хантараактары толоруу иһин, тутууну өйөөһүн миэрэлэрэ ылылыннылар. Маныаха, биир аҕалан биэрээччини булууттан саҕалаан, импорт матырыйаалларын авансалаан уонна солбуйан биэриигэ тиийэ боппуруостар көрүлүннүлэр.
Андрей Тарасенко биэдэмистибэлэр салайааччыларыгар куттал үөскүөн сөптөөх хас биирдии эбийиэгин уонна ол тула ыытыллар дьайыылар тустарынан, сиһилии сырдатыыны биэрэллэригэр дьаһайда. Маны таһынан, көстөр кыһалҕалары аччатар туһунан этиилэри киллэрэллэригэр соруйда. Бу барыта Арассыыйа Федерациятын толорор былааһын федеральнай уорганнарын таһымыгар эбии көрүллүөҕэ...
2022 сылга Саха сиригэр 11 национальнай бырайыак чэрчитинэн 45 эрэгийиэннээҕи бырайыак олоххо киириэхтээх.
СӨ Ил Дарханын уонна СӨ Бырабыыталыстыбатын пресс-сулууспата
