Бу күннэргэ өрөспүүбүлүкэ 100 сылын бэлиэтиир тэрээһиннэр саҕаланнылар. Ол чэрчитинэн, Айсен Николаев, бастатан туран, Саха сирин сайдыытыгар улахан кылааттарын киллэрбит СӨ Ытык Сүбэтин чилиэннэрин кытта көрүстэ, кэлэн иһэр бырааһынньыгынан эҕэрдэлээтэ.
Ил Дархан 1922 с. муус устар 27 күнүгэр автономия ылыллыаҕыттан өрөспүүбүлүкэ сайдыытын саҥа түһүмэҕэ саҕаламмытын, бырамыысыланнас, үөрэхтээһин, билим, култуура, олох таһыма сайдар суолга үктэммитин бэлиэтээтэ.
“Ол кэннэ 1992 с. ылыныллыбыт СӨ Төрүт сокуона биһиги өрөспүүбүлүкэбит Арассыыйа Федерациятын быстыбат сорҕото буоларын мэктиэлээбитэ. Онтон бэттэх биһиги бүтүн дойду дьонун кытта үгүһү үлэлээтибит. Күн бүгүн Сахабыт сирэ Уһук Илин, ону ааһан бүтүн Арассыыйа биир стратегиялаах суолталаах эрэгийиэнэ буолла.
Эһиги хас биирдиигит дьылҕата биһиги өрөспүүбүлүкэбит устуоруйатын чаҕылхай балаһаларын кытта ыкса ситимнээх, хас биирдиигит кини сайдыытыгар сүҥкэн кылааты киллэрбитэ”, – диэтэ Айсен Николаев уонна үбүлүөй аҕа саастаах көлүөнэ айбытын-туппутун үйэтитэр, кинилэр патриоттуу холобурдарыгар үүнэр көлүөнэни иитэр-үөрэтэр соруктааҕын эттэ, бу уустук кэмҥэ түмсүүлээх буолуохтаахпытын санатта.
Ытык Сүбэ чилиэннэрэ бу курдук уустук, быыһык кэмҥэ дойду бэрэсидьиэнин уонна өрөспүүбүлүкэ Ил Дарханын быһаарыыларын өйүүллэрин биллэрдилэр. Саха сирин социальнай-экэнэмиичэскэй сайдыытыгар сыһыаннаах санааларын тиэртилэр.
