Саха сиригэр 2023-2027 сыллар саха литературатын төрүттээччи, сырдатааччы уонна уопсастыбаннай диэйэтэл А.Е. Кулаковскай-Өксөкүлээх Өлөксөйгө анаммыт Биэс сылынан биллэрилиннэ. Маннык ыйааҕы СӨ Ил Дархана «Алексей Елисеевич Кулаковский — духовный лидер Якутии» научнай, практическай симпозиумҥа биллэрдэ.
«Алексей Кулаковскай нэһилиэстибэтэ саха норуотугар, Саха сиригэр тулхадыйбат сыаннаһынан уонна баайынан-дуолунан буолар. Алексей Кулаковскай күүстээх уларыйыылары өтө көрөөччүнэн эрэ буолбакка, бэйэтин дойдутун дьылҕатыгар быһаарыылаахтык сабыдыаллаабыт киһи. Кини бэйэтин кэмин идиэйэлэрин эрэ буолбакка инники олоххо тиийэ анаарбыт өркөн өйдөөх киһи. Ааспыт үйэ үрдүттэн, биир үйэлээх устуоруйа нөҥүө көрдөххө, биһиги кини оҥорбут дьайыылара хас даҕаны көлүөнэ дьоҥҥо сүҥкэн оруолу ылбыттарын көрөбүт», - диэн Айсен Николаев бэлиэтиир.
Хаҥалас улууһун Хачыкаат нэһилиэгэр буолбут улахан тэрээһиҥҥэ 400 тахса киһи кытынна, ол быыһыгар Таатта, Өймөкөөн, Ньурба уо.д.а. улуустарыттан кыттыыны ыллылар. Симпозиум үлэтин түмүгүнэн, А.Е. Кулаковскай 150 сааһын көрсөргө аналлаах резолюция таҥыллыаҕа.
СӨ Ил Дарханын уонна Бырабыыталыстыбатын пресс-сулууспата сырдатыытыттан
