41 саастаах Сердар Бердымухамедов Туркмения бэрэсидьиэнин олбоҕор 2022 сыл кулун тутар 19 күнүгэр олорбута. Кини бу дойду иккис бэрэсдьиэнэ Гурбангулы Бердымухамедов соҕотох уола. Кэргэннээх, биир уол, үс кыыс оҕолоох.
Аҕа баһылык буолаат, Сердар Бердымухамедов дьахталларга сыһыаннаах кэккэ бобор сокуону олохтоон, аан дойдуга улахан соһуйууну-өмүрүүнү таһаарда. Дьэ, туркмен дьахталларыгар аны туох бобуллар эбитий?
Ботокс, оҥоһуу тыҥырах, кыламан, силиконовай түөс
Ботоксу күүстээх дьаат, оттон оҥоһуу тыҥыраҕы уонна кыламаны, силиконовай түөһү туора эттик быһыытынан билиннилэр. Онон, итилэр Туркменистаҥҥа букатын бобулуннулар. Ыйыллыбыт өҥөнү оҥорор тэрилтэлэр уонна оҥорторор дьахталлар суутунан эппиэттиир, ыстарааптанар эбэтэр 15 күҥҥэ хаайыыга ыытыллар кутталлаахтар. Тэрилтэлэр номнуо уоһу уонна түөһү улаатыннарбыт үлэһиттэрин ууратан эрэр сурахтаахтар.
Баттаҕы кырааскалатыы, перманент бары көрүҥэ, маникюр уонна педикюр
Бу дьахтар аймах киэҥник туһанар өҥөлөрө эмиэ бобулуннулар. Онон айылҕа биэрбитинэн сылдьар ирдэнэр. Маны бэрэбиэркэлээһин үөрэх тэрилтэлэригэр, оскуолаттан саҕалаан университекка тиийэ, киэҥник ыытыллар.
Кыараҕас, ыбылы тутар, кылгас таҥас
Дьахтар итинник таҥастаах сырыттаҕына сокуону кэһээччи буолар. Онон, мантан антах туркмен дьахталлара төрүт омуктарын эрэ таҥаһын кэтэргэ тиийэллэр.
Массыынанан эр киһитэ суох уонна хойут сылдьыы
Аны дьахтар массыынанан соҕотох айанныыра көҥүллэммэт. Кинини хайаан да кэргэнэ эбэтэр аймах эр киһитэ арыаллыахтаах. Ону даҕаны иннигэр олороро табыллыбат. Маны кэһии иһин суол полицията дьахтары 2.000 долларга ыстарааптыах кэриҥнээх.
Маны таһынан, Туркмения парламеныгар дьахтар тас дойдуга тахсарын бобор туһунан кэпсэтэллэр. Саҥа бэрэсидьиэн толкуйунан, тас дойдуга тахсыбыт туркмен дьахтара дойдутун аатын түһэрэр эбит.
Сэҥээриилэр