Киир

Киир

СӨ Ил Дархана Айсен Николаев бэс ыйын 1 күнүгэр, Татарстан өрөспүүбүлүкэтин премьер-миниистирин солбуйааччыта, татар омук Бүтүн аан дойдутааҕы кэнгириэс Национальнай Сүбэтин бэрэссэдээтэлэ Василь Шайхразиевы кытта көрүстэ.

6Q5A2139

Салайааччылар Саха АССР төрүттэммитэ 100 сылыгар анаммыт Саха сиригэр Татарстан Өрөспүүбүлүкэтин күннэрин тэрийиигэ бэлэмнэнии үлэтин туһунан ырытыстылар.

Көрсүһүү бириэмэтигэр, Айсен Николаев буолаары турар тэрээһин икки эрэгийиэн сайдыытыгар уонна бииргэ үлэлэһиигэ улахан суолталааҕын туһунан бэлиэтээтэ.

«Татарстан өрөспүүбүлүкэтин күннэрин бырагырааммата олус өлгөмүттэн уонна тэрээһиннэрэ баайыттан үөрдүм. Бу бырааттыы үтүө сыһыаны салгыы сайыннарарга төрүөт буолуоҕа. Эһиги биһиэхэ кэлбиккититтэн үөрүөххүт диэн олус эрэнэбин. Оруобуна бу күннэргэ, Саха сирин бары олохтоохторун түмэр төрүт бырааһынньыкпыт Туймаада Ыһыаҕа буолуоҕа», - диэн Айсен Николаев этэр.

6Q5A2307

Татарстан Өрөспүүбүлүкэтин премьер-миниистирин солбуйааччыта, татар омук Бүтүн аан дойдутааҕы кэнгириэс Национальнай Сүбэтин бэрэссэдээтэлэ Василь Шайхразиев Айсен Николаевка истиҥ көрсүһүүтүн уонна ыалдьытымсах быһыытын иһин махтанна.

Кини этэринэн, Татарстан Өрөспүүбүлүкэтин Бэрэсидьиэнэ Рустам Нургалиевич Минниханов баһылыктаах эрэгийиэн официальнай делегациятыгар парламент уонна бырабыыталыстыба, урбаан уонна култуура, суруйааччылар сойуустарын бэрэстэбиитэллэрэ баар буолуохтара.

6Q5A2276

Саха сиригэр Татарстан Өрөспүүбүлүкэтин Күннэрин бары тэрээһиннэрэ көрүлүннүлэр уонна бигэргэннилэр.

Санатар буоллахха, Саха сиригэр Татарстан өрөспүүбүлүкэтин күннэрэ бэс ыйын 23 күнүттэн 25 күнүгэр диэри ыытыллыахтара. Тэрээһин чэрчитинэн, социальнай уонна экономическай сайдыы боппуруостарыгар уонна меморандумнарга сөбүлэҥнэргэ илии баттааһын былааннанар. Маны сэргэ, «Татарстан – Саха сирэ» дьыалабыай форум, Арассыыйа инновационнай эрэгийиэннэрин Ассоциациятын мунньаҕа, ускуустуба маастардарын кэнсиэртэрэ уонна Татарстан Өрөспүүбүлүкэтин уус-уран норуодунай оҥоһуктарын уонна декоративнай-прикладной ускуустубаларын быыстапкалара буолуохтара.

СӨ Ил Дарханын уонна Бырабыыталыстыбатын пресс-сулууспата сырдатыытыттан

Тарҕат:

Санааҕын суруй