Киир

Киир

Бу күннэргэ Бурятия киин куоратыгар Улан-Удэҕэ Уһук Илиҥҥи федеральнай уокурукка судаарыстыбаннай национальнай бэлиитикэ олоххо киириитин тула сэминээрдээх сүбэ мунньах ыытылынна.

Манна РФ Бэрэсидьиэнин дьаһалтатын, Норуоттар дьыалаларыгар федеральнай ааҕыныстыба,  «Арассыыйа норуоттарын дьиэтэ» федеральнай тэрилтэ уонна уокурук бары регионнарын бэрэстэбиитэллэрэ кытыннылар. Саха сириттэн тас дойдулары кытта сибээс уонна СӨ норуоттарын дьыалаларын миниистирэ Гаврил Кириллин сырытта.

IMG 4449

Тэрээһиҥҥэ сүрүн болҕомтону национальнай-культурнай түмсүүлэр алдьатыылаах хамсааһыннарга кубулуйууларын сэрэтиигэ уурдулар.  Кыттааччылар сонун тарҕатар интэриниэт эйгэлэргэ уонна социальнай ситимнэргэ норуоттар икки ардыларыгар атааннаһыыны, религиялары харсыһыннарыыны күөттээһини, экстремистии уонна русофобиялыы быһыыланыыны кыраҕатык кэтиир ирдэнэр диэн түмүккэ кэллилэр. Ону сэргэ, интэриниэт көмөтүнэн уопсастыбаҕа  алдьатыылаах дьайыыны оҥорор холбоһуктары уодьуганныырга ыччат ортотуттан кибердружиналары тэрийэн, өйөөн үчүгэйдик үлэлэтэргэ быһаардылар.   

Регионнарга норуоттар икки ардыларыгар эйэни харыстыыр туһугар Бүтүн Арассыыйатааҕы «Ассамблея народов России» уопсастыбаннай-судаарыстыбаннай тэрилтэ уонна «Арассыыйа норуоттарын дьиэтэ» федеральнай тэрилтэ салааларын тэрийии үчүгэй  дьайыылаах буолуо диэн кэпсэттилэр. Холобура, «Арассыыйа норуоттарын дьиэтэ» Уһук Илиҥҥи уокурук хас биирдии  регионугар күүскэ ирдэнэр этнотуризмы уонна норуот оҥоһуктарын тарҕатыыны сайыннарар хайысхалары тутуһуохтаах. Бу Дьиэҕэ маастар-кылаастары ыытарга уонна бэйэ бородууксуйатын көрдөрөргө элбэх регион сайаапка ыыппыт.   

Ити курдук кыттааччылар норуоттар уонна религиялар икки ардыларыгар или-эйэни харыстыыр бастыҥ ньымалары ырыттылар, Арассыыйа судаарыстыбаннай национальнай бэлиитикэтин күүһүрдэр, хас биирдии киһи бэйэтин гражданин быһыытынан сананыытын үрдэтэр суолу-ииһи тобуллулар.

Сонун төрдө: СӨ Бырабыыталыстыбатын уонна Ил Дарханын пресс-сулууспата

Тарҕат:

Санааҕын суруй